’n Verklaring wat Maandag deur Buckingham-paleis vrygestel is, bevestig dat Koning Charles III met kanker gediagnoseer is.
Die Koning, wat onlangs die hospitaal besoek het om ‘n prosedure vir ‘n goedaardige prostaatvergroting te ondergaan, is met ‘n vorm van kanker gediagnoseer nadat ‘n “afsonderlike kwessie van kommer” opgemerk is tydens sy verblyf in die hospitaal. Hy het reeds met behandeling begin.
Die verklaring wat deur Buckingham-paleis vrygestel is, lui soos volg:
“Tydens die Koning se onlangse hospitaalprosedure vir goedaardige prostaatvergroting, is ‘n aparte kwessie van kommer opgemerk. Daaropvolgende diagnostiese toetse het ’n vorm van kanker geïdentifiseer.”
Dit gaan voort:
“Sy Majesteit het vandag ‘n skedule van gereelde behandelings begin, waartydens hy deur dokters aangeraai is om openbare pligte uit te stel. Sy Majesteit sal gedurende hierdie tydperk voortgaan om staatsake en amptelike papierwerk soos gewoonlik te onderneem.”
Volgens ‘n artikel wat deur die BBC gepubliseer is oor sy onlangse diagnose, dui Britse syfers daarop dat die kans om kanker te kry met ouderdom toeneem, met meer as 36% van nuwe kankergevalle wat by individue van 75 en ouer gediagnoseer word.
