Suid-Afrika se ‘Klein Kwagga’ het oornag bekendheid verwerf nadat ‘n video van sy danspassies op Bernice West se plaaslike treffer, Lyfie by sy suster se danskonsert in 2023 wyd versprei het. Die skattige agtjarige Dirkco Jansen van Nieuwenhuizen se aansteeklike ritme bereik vandag selfs die verste uithoeke van die wêreld en het onlangs op The Kelly Clarkson Show verskyn.
Die Amerikaanse sanger en geselsprogramaanbieder Kelly Clarkson het as deel van haar ‘What I’m Liking’- segment op die video van SA se dansende sensasie gereageer en hom en sy ma, Mercia na die program vir ‘n onderhoud genooi.
Clarkson het daarna Klein Kwagga aan haar (meestal Amerikaanse) gehoor via’n video-oproep voorgestel, en gesê:
“Daar is iets om te sê vir diegene wat die hardste dans, met die wete dat byna almal kyk.”
“Kwagga, jy het geen idee hoeveel vreugde jy vir my gebring het nie. Jy sal beste vriende met my seun wees, ek sweer.”
Toe Mercia, Dirkco se ma, gevra is hoe die oomblik ontvou het, het sy gesê dat hulle nog altyd hul seun so ken, maar dat ‘n paar van sy dansbewegings selfs hulle verbaas het.
“Dit was baie lekker, maar dis hoe ons vir Klein Kwagga ken. Maar ja, daar was ’n paar bewegings waarvan ons nie geweet het nie!”
Nadat sy haar geselsie met die familie afgesluit het, het Kelly Dirkco aangemoedig om sy klein vonkie aan die gang te hou deur te dans:
“Jy is my gunsteling What I’m Liking wat ek op die program gehad het, jy is so wonderlik. Ek is lief vir jou, hou aan dans!”
Lees ook: KYK: Springbok Willie le Roux en sy Holly sê ja in Franschhoek
