Lees saam met jou kind op Wêreld Boekedag

Deur Mariette Snyman, verwerk deur Martie Pansegrouw. Hooffoto: iStock/Kerkez

Lees vir ons ’n storie!

In ons besige wêreld bly rustige saamweestydjies dikwels in die slag. Ouers moet skarrel om by te hou met werk, hul kinders se bedrywighede en behoeftes, sosiale aktiwiteite, en ‘n magdom ander eise. Soms wil hulle net ‘n rukkie sit en hul asem terugkry.

Die goeie nuus is dat die voorlees van ‘n storie vir jong kinders vir hulle én vir jou lekker kan wees. Dit bind julle saam en dit hou groot voordele vir kinders se intellektuele en skolastiese ontwikkeling in. Daarby maak die identifikasie met karakters en situasies hulle emosioneel slimmer – veral as jy tussendeur met hulle oor die storie gesels. En as jy styf teen jou kind sit, skei julle albei sommer ekstra goedvoelhormone af.

Lees ook: Jy kan jou kinders aan die lees kry

Hoekom is dit belangrik tyd vir lees te maak?

‘n Opname deur die South African Book Development Council wys dat slegs 35% van alle volwassenes met kinders in die huis vir hulle voorlees.
Terselfdertyd wys ŉ 2016 Progress in International Reading Literacy-studiestuk wat op leesbegrip gefokus het dat 78% van alle Suid-Afrikaanse graad 4-leerders nie doeltreffend vir betekenis kan lees nie.
Geletterdheidsvaardighede is ŉ sterk voorspeller van kinders se akademiese sukses in alle vakke; kinders wat gereeld stories lees en hoor waarvan hulle hou – in tale wat hulle verstaan – is beter toegerus en gemotiveer om te leer lees en skryf.
Onlangse navorsingstudies en opvoedkundekenners is besig om te bewys dat papier meer voordele vir leerders inhou as digitale toestelle, veral wat lees en begrip betref.

Lees ook: Help jou kind se leesvaardighede aan

Dis maklik om tyd vir stories te maak!

Hier is vyf eenvoudige dinge wat jy kan doen om seker te maak dat storietyd meer gereeld gebeur

Skakel alles af en maak tyd om te lees

Skakel jou selfoon af en lees 15 tot 20 minute vir jou kind (klein of groot) voor. Jy is nooit te oud om dit te geniet wanneer iemand vir jou voorlees nie. Ouer kinders kan selfs vir jou voorlees!

Kies saam ’n storie

Soek die storie saam uit, op julle eie boekrak of in die biblioteek. Jy kan ook ŉ boekeruil met vriende organiseer.

Kry ’n lekker leesplekkie

Soek ŉ stil, gemaklike hoekie vir saamlees. Maak ŉ tent met ŉ laken en kussings! Sorg dat daar nie speelgoed of toestelle is om die tydjie te bederf nie (maar dalk wil Teddie ook die storie hoor!)

Drama, drama, drama!

Dramatiseer die storie met verskillende stemme en aksente. Kry die kinders om klanke soos ŉ motor wat wegtrek, ŉ hoender wat kraai, of ŉ gil te verskaf. As daar ouer kinders is, kan elkeen ŉ sekere karakter se woorde lees.