Rooibostee-en-jogurt-koek

Rooibostee-en-jogurt-koek. Deur Vickie de Beer. Foto’s deur CRPHOTOGRAPHIC.

Genoeg vir 1 middelslag-koek van 20 cm met 3 lae.

Bestanddele

• 300 g botter
• 300 ml rooibostee
• 356 g bruismeel
• 420 g strooisuiker
• knypie sout
• 1 ml (¼ t) wonderpeper
• 1 takkie roosmaryn, gekap
• 3 eiers, geklop
• 150 g tuisgemaakte jogurt (*sien onder)

Room

• 400 g ricotta
• 400 g mascarpone
• 60 ml (¼ k) versiersuiker
• gerasperde skil van 1 lemoen

Tooisel

(Die tooisels is opsioneel, maar dit maak die koek ekstra spesiaal)

• 1 vars heuningkoek
• 60 ml (¼ k) heuning
• 1 lemoen, in ringe gesny
• 45 ml botter

Metode

1. Verhit die oond tot 170 °C. Voer 3 x 20 cm-losboom-koekpanne met bakpapier uit en smeer met botter.
2. Smelt die botter in die verhitte rooibostee en hou eenkant.
3. Sif die bruismeel, strooisuiker, sout, wonderpeper en roosmaryn saam.
4. Klits die botter-en-rooibos-mengsel met ’n elektriese menger of handklitser by die meelmengsel.
5. Voeg die eiers een vir een by terwyl jy deurentyd klits. Voeg die jogurt by en klits saam tot goed gemeng.
6. Verdeel die koekbeslag tussen die koekpanne.
7. Bak vir 30 – 35 min. of tot ’n toetspen skoon uitkom.

Room

1. Meng die ricottakaas, mascarpone, versiersuiker en lemoenskil liggies saam – moenie te veel meng nie.
2. Smeer die versiersel oor elke koeklaag. Stapel die koeklae op ’n koekstander of dienbord opmekaar en voltooi met ’n laag ricottaversiersel.
3. Karamelliseer die lemoenringe aan albei kante in die gesmelte botter. Laat afkoel.
4. Versier die koek met die lemoenskywe en vars heuningkoek en gooi die heuning oor.

*Maak jou eie jogurt

Genoeg vir sowat 1 liter

1. Verhit 2 liter (8 k) volroommelk in ’n groot kastrol oor matige hitte. Laat die melk liggies prut en ’n vel vorm.
2. Trek van die hitte af en laat afkoel totdat jy jou vinger kan indruk sonder om te brand.
3. Meng 250 ml van die louwarm melk en 125 ml (½ k) volroomjogurt in ’n bakkie.
4. Gooi die melk-en-jogurt-mengsel terug in die kastrol. Roer eenmaal.
5. Gooi die mengsel in gesteriliseerde flesse of in een groot fles en seël dig.
6. Sit die flesse in ’n kastrol vol warm water en laat die jogurt vir 18 uur daarin “broei”.
7. Haal uit die kastrol en hou in die yskas