Die normale, gesonde siening van rekmerke is dat dit deel is van jou lewensreis, sê Maropeng Ralenala, kliniese sielkundige van Johannesburg.
“Rekmerke is tekenend van twee noodsaaklike fases in jou lewe – die intrede tot vrouwees tydens die tienerjare, en moederskap.”
Maar wat as jy nie wil vrede maak daarmee nie? Kan jy keer dat jy tydens swangerskap rekmerke ontwikkel ? Of keer dat jou dogter tydens haar puberteit skielik met rekmerke sit? Jy kan probeer, sê dr. Ayesha Moolla, Kaapse dermatoloog.
“Maar daar is nie waarborge nie. Jou gene bepaal waarskynlik hoe maklik jy of jou dogter rekmerke kry.”
Daar is twee benaderings om rekmerke weg te toor. Jy kan keer dat jy dit ontwikkel óf as dit reeds daar is, kan jy dit probeer ligter maak.
Die beste twee wenke om rekmerke te voorkom
1. Masseer die areas wat heel moontlik aangetas kan word daagliks met olies en rome
Vir tieners is dit die bors-area, heupe en bobene. Swanger vroue moet fokus op die buik, bobene en borste. Sukses is egter wisselvallig, sê Ayesha.
“Dit lyk asof ferm, gereelde massering met ’n olie of room by baie mense die vel meer soepel maak, maar jy kan nie jou tiener beloof dat sy geen rekmerke sal kry nie, want dit help vir party glad nie. Aan die ander kant is dit al tegniek tot ons beskikking om die vel te rek. Dit maak dus sin dat swanger vroue en jong tieners wat skielik begin groei, elke aand die vel met olie masseer.”
2. Tel stadig gewig op
Dit is normaal en gesond dat jou gewig tydens puberteit en swangerskap opskuif. Dit beteken nie dat jy vet word nie, maar wel dat jy (of jou baba) groei. Hou dop sodat jy geleidelik gewig aansit. Dit gee die vel meer tyd om geleidelik te rek.
Die beste drie terapieë om rekmerke te verminder
Die terapieë sal nie rekmerke voorkom of heeltemal verwyder nie maar hulle kan dalk jou merke ligter en amper onopvallend maak.
1. Retinoïede en tretinoïen (aknee-medikasie)
Moet gebruik word terwyl die merke nog vars en rooi-pers is. Maar dit is teratogenies (veroorsaak geboorte-afwykings) en nie geskik vir swanger vroue of vroue wat beplan om binne die volgende ses maande swanger te raak nie. Jy móét ’n velspesialis raadpleeg aangesien dit nie vir almal geskik is nie.
2. Laserterapie
Ook nie geskik vir swanger vroue óf vir alle velsoorte nie. Kry raad by ’n betroubare laserkliniek.
3. Velafskilfering met AHA’s en soortgelyke middels
Geskik vir swanger vroue. Laat dit professioneel by ’n skoonheidskliniek doen.
Lees ook: Hoe om te verseker dat jou bra’s ’n langer lewe het
Lees Meer
