Deur Margaret Gardiner.
Wuthering Heights ontplof op ’n skerm naby jou, en vroue gaan vra: Wie is Jacob Elordi? Met twee Golden Globe-benoemings vanjaar, een vir Netflix se Frankenstein waarin hy die monster speel, en die ander vir Narrow Road to the Deep North wat in ’n Japannese krygsgevangenekamp afspeel, vestig Jacob Elordi homself vinnig as die nuwe ‘it’-outjie – nie net sag op die oë nie, maar ook in staat tot suggestiewe en ontroerende spel.
Margaret Gardiner het Jacob Elordi verlede jaar by die premiere van Frankenstein ontmoet. (Foto: Verskaf)
In ’n kort tydjie het hy ’n indrukwekkende reeks werk opgebou, baie wat vereis dat hy ’n weerlose innerlike lewe en botsende emosies uitbeeld. Hoewel tieners verlief geraak het op hom in die Netflix-fliekreeks The Kissing Booth (2018-2021), en die cool groep hom in Euphoria ontdek het, was dit Emerald Fennel se Saltburn (2023) wat werklik oë op hom laat vestig het. Die 1,96 m lange Elordi het ’n Bafta-benoeming gekry as die ryk kind wat vir die arm kind opstaan (Barry Keough) en hom in die ‘in’-skare aanneem, net om teen hom te draai met katastrofiese gevolge. In 2023 het hy Elvis vertolk in Sofia Coppola se Priscilla (2023) en is in die wedloop vir vanjaar se Oscar vir Beste Ondersteunende Akteur vir Frankenstein. Sy jongste fliek, Warner Brothers se Wuthering Heights, sal vir seker ’n loketsukses wees en is op Valentynsdag vrygestel.
Jacob Elordi en Margot Robbie (Foto: REUTERS/Mario Anzuoni)
Die seun van Brisbane, Australië, het die vermoë om empatie en wreedheid met ewe veel gemak te toon. Al sy rolle behels ’n karakter wat ’n oorlog binne homself voer en op ’n fyn spandraad loop van watter innerlike drang sal oorheers: die eerbare of die verskriklike.
(Foto: REUTERS/Jack Taylor)
In Wuthering Heights lewer hy nog ’n kleurryke vertolking as Heathcliff, teenoor Margot Robbie se Catherine. As die romantiese hoofrolspeler sal hy vir seker die harte van miljoene vroue verlei, wat die obsessie van Catherine en dié van haar man se pleegkind, Isabella (Alison Oliver), met die broeiende Heathcliff heeltemal verstaanbaar maak.
Die fliek, weereens deur Emerald Fennel geregisseer, is weelderig in kostuums en omgewing en dit beeld die passie van twee jongmense, wat in wreedheid en armoede grootgemaak is, uit. Margot (Catherine) is die dogter van ’n aristokraat wat sy fortuin weggedobbel het. Jacob (Heathcliff) is die seun wat deur Catherine se pa van fisieke mishandeling gered word. Hulle wend hulle tot mekaar vir troos en raak verlief, ten spyte daarvan dat hy ’n arbeider en sy die dogter van ’n aristokraat is. Wanneer ’n welgestelde buurman intrek en verlief raak op Catherine en haar vra om te trou, hoor Heathcliff ’n gesprek waar Catherine vir Heathcliff afkraak en vertel dat sy ingestem het om te trou. Hy vertrek voordat sy erken dat sy spyt is dat sy ingewillig het en eintlik vir Heathcliff liefhet. Wat volg, is ’n passievolle, obsessiewe liefde wanneer Heathcliff terugkeer, Catherine se voormalige huis koop en die twee voor ‘n erotiese liefdesverhouding swig ten spyte daarvan dat Catherine swanger is met haar man se kind. Wanneer Catherine die verhouding verbreek, trou Heathcliff met Isabella om hom op Catherine te wreek.
Emily Brontë se Wuthering Heights, wat sy in 1847 geskryf het, is ’n klassieke rolprent met ’n goeie rede. Die Gotiese romanse beweeg na die uiterstes. Dit ondersoek sosiale klas, obsessiewe liefde en wraak. Die fliek fokus op die passie, en doen dit met soveel visuele oorvloed dat ’n mens die werklikheid opskort en meegesleur word.
Emerald is meesterlik in haar regie. Sy vang die polsende passie van wellus en die tweelingemosies van liefde en haat vas wanneer liefde gedwarsboom word. Sy gooi ’n bietjie van ’n kinkel in en bevredig elke vrou se plesier in al die uitsonderlike visuele elemente. Die fliek is die moeite werd om te sien vir die kostuums alleen. Margot is pragtig, maar Jacob is haar gelyke. Maak nie saak hoe hard hy probeer om dit te vermy nie, ná Wuthering Heights sal hy hartebrekerstatus bereik. Hierdie fliek sal hom een van die top- smeulende akteurs in Hollywood maak.
Tot nou toe het hy die glans van roem ontwyk terwyl hy die voorreg van elke jong opkomende ster geniet het – en met die mooistes van die beroemdes uitgegaan het. Die lys sluit in Euphoria-medester, Zendaya, Cindy Crawford se dogter, Gia, en Joey King. Die 28-jarige het drie ouer susters en is ’n eerstegenerasie-Australiër. Sy pa kom van Spanje. Ten spyte daarvan dat hy in skooltoneelstukke opgetree het, het hy ook in rugby en basketbal uitgeblink, en is hy ’n ywerige leser.
Jacob is gewaarborg om die boonste vlakke van sterstatus te bereik. Sy langdurigheid sal afhang van hoe hy roem hanteer. Sy familie bly sy anker. Sy ma was die een wat hom wakker gemaak het met die nuus dat hy ’n Oscar-benoeming vir Frankenstein ontvang het, en sy toekoms blyk in die sterre geskryf te wees. Nadat ek hom by die première van Netflix se Frankenstein ontmoet het, het hy ’n seunsagtige entoesiasme en ’n groot respek vir die kuns van toneelspel beliggaam. Leer ken sy naam, want as hy roem kan regkry, sal hy nog dekades lank hier wees.
KYK | Margot Robbie en Jacob Elordi se uitrustings vir Wuthering Heights se reklameveldtog
Volg Margaret op Youtube, Facebook, Twitter en Instagram!
Lees ook: Margaret uit Hollywood | Send Help: Sal jy jou nare baas help of self beseer?
