Deur Martjie Roos. Foto’s: Hanneri de Wet
Ons kaptein word vandag 56 jaar oud en span steeds sy seile! Hier’s een van ons gunsteling-onderhoude met hom.
Sedert die gewilde sanger Kurt Darren sy eerste treffer ‘Meisie meisie’ in 2002 uitgereik het, het sy gewildheid nie getaan nie en ry hy steeds op die golf van sukses. Buiten sy roemryke sangloopbaan is Kurt ook ’n toegewyde pa, mentor, entrepreneur en eggenoot. En sy wederhelf, Dunay, is die anker op sy lewensreis
Dit is woelig en bedrywig in Kurt en Dunay se huishouding in Pretoria. Die egpaar se kroos, die tienjarige Kyrah en die agtjarige Kade is volstoom aan die gang en energiek. Buiten hul skoolwerk is daar ook buitemuurse aktiwiteite. Kyrah neem deesdae perdrylesse en Kade is weer ’n uitblinker in die swembad.
“Die twee word so vinnig groot,” sê ma Dunay. “Ek wil die goue oomblikke van hul kind-wees bewaar – al is die huis soms deurmekaar en raserig, is dit baie stil wanneer hulle nie hier is nie.”
Kurt stem heelhartig saam. “Dit is al daardie eerstes wat kosbare oomblikke is en wat ek ook wil koester – soos Kyrah se eerste perdryles en haar prestasie toe sy as beste nuweling aangewys is en Kade se eerste welslae in die Kansa-swemmaraton toe hy ’n medalje gewen het.”
Kurt is ’n toegewyde en betrokke pa. Wanneer hy tuis is en nie op een van sy talle konserttoere nie, neem hy graag die kinders skool toe of na hul buitemuurse aktiwiteite en moedig hulle langs die sportveld aan. “Ons probeer om ’ n gesonde en openhartige verhouding met ons kinders te kweek en om vir hulle goeie waardes te leer. Ek leer Kade hoe om ’n gentleman te wees deur self ’n goeie voorbeeld te stel – ek maak byvoorbeeld altyd die motordeur vir Dunay oop. Dunay en Kyrah het ook ’n oop ma-en-dogter-verhouding.”
Buiten Kurt se bedrywige musiekloopbaan, opnames en konserte, bestuur hy en Dunay ook hul geleentheidsmaatskappy Super Events.
“Ons maatskappy reël onder meer bootvaarte soos die Super Sokkie Cruise asook konserte soos die Super Sokkie Grand West in Kaapstad en Super Sokkie Carnival City by Carnival City in Brakpan wat aan talle plaaslike kunstenaars blootstelling gee. Ons reël ook ’n Kids en Teens Cruise vir die kinders elke jaar.”
Dunay is Kurt se raakvat-regterhand met die reël en administrasie van die konserte. “Sy sorg byvoorbeeld vir die plakkate, besprekings, bemarking en administrasie van die bootvaarte.”
Dié voormalige model, wat in 2014 ’n meestersgraad in sielkunde verwerf het, het Kurt die eerste keer ontmoet toe sy in 2004 in een van sy musiekvideo’s gespeel het. Hulle was eers vir vier maande goeie vriende voordat dit ernstige sake begin word het, en die twee het in 8 Januarie 2011 op sy wildsplaas ewig trou aanmekaar gesweer.
Dunay het ’n klein hartjie, veral wanneer dit by diere en kinders kom. Sy is by die Wet Nose Animal Rescue-sentrum betrokke wat onder meer nuwe tuistes vir verwaarloosde en hawelose diere vind. Sy lewer ook motiveringspraatjies en het byvoorbeeld verlede jaar vir jong skoolmeisies ’n praatjie gelewer oor hoe om ’n dame te wees en ook by Rock of Hope,’ n hawe vir veiligheid, oor ouerskap gepraat. “Ek bewonder haar doelgerigtheid en toewyding,” sê Kurt terwyl hy met liefdevolle oë na sy vrou kyk. Wedersydse respek is beslis ’n goue draad in hul huwelik.
“Ek het weer respek vir Kurt se werksetiek en deursettingsvermoë sowel as sy pligsgetrouheid. Hy is baie lief vir sy musiek en sy loopbaan, en niks bring hom maklik van stryk nie – hy gaan lê nie sommer nie. Tydens die Covid-pandemie het hy steeds werk vir homself en ander kunstenaars gegenereer toe hy die stromings-vertoning Afrikaans gaan global gereël het. Die vertoning was twaalf uur lank en 26 plaaslike kunstenaars het by die Valley of the Waves in Sun City daaraan deelgeneem,” vertel sy.
Wanneer ’n nuwe liedjie van Kurt die digitale platforms en stroomdienste tref, dan kan jy maar weet – hier kom nog ’n groot wegholtreffer. Die “kaptein” soos Kurt oral bekend staan, se trefferliedjies is net die regte doepa om enige partytjie, sokkie of braaivleis te laat vlam vat.
Hy mentor talle jong kunstenaars en wanneer opkomende kunstenaars vir Kurt vra wat is sy wenresep, huiwer hy nie een oomblik om te antwoord en goeie raad te gee nie. “As jy nie toewyding of passie van die begin af het nie, staan jy nie ’n kat se kans om dit in die musiekbedryf te maak nie. Wanneer jy ’n lewe uit musiek wil maak, moet jy gedissiplineerd wees.”
Hy voeg in dieselfde asem by: “Maar jy moet ook geniet wat jy doen, want musiek is vir my pret.”
Dit was allermins plain sailing vir die kaptein van sokkie-sokkie en danstreffers. “Onthou, ek het vyf albums uitgereik voordat ‘Meisie meisie’ opgeneem is en ek ’n deurbraak kon maak. ”
Hoewel die musieklandskap drasties met die koms van digitale platforms en stroomdienste verander het, het sy standaarde dieselfde gebly. “Ek hou my oog altyd op die bal, maar ek doen my eie ding en steur my nie veel aan kompetisie nie. My kompetisie is my laaste album waarop ek probeer verbeter. Ek weet ook dat my musiek nie altyd in almal se smaak val nie. Jy sal altyd mense kry wat van jou musiek hou en mense wat nie daarvan hou nie. En’n mens moet dit so aanvaar.”
Sy treffer ‘Hop, hop, spinnekop’ het oornag ’n wegholtreffer geword. Die liedjie is binne ’n paar weke meer as 35 miljoen keer op die gewilde platform TikTok gebruik en op YouTube is daar bykans een miljoen keer binne drie weke na die musiekvideo gekyk. “Hop hop spinnekop” is deur die hoofkarakter Jenna Ortega in die Netflix-reeks Wednesday se dans geïnspireer en was ’n spanpoging – Kurt het talente saam met Don Kelly, Dirk van Niekerk en Dan Green gesnoer om die treffer te skryf.
Dunay het ook die geleentheid gekry om haar slag as liedjieskrywer op manlief se jongste album 100 persent te wys – sy het saam met Kurt die liedjie “Bos is my kos” geskryf wat hy ook op die nuwe album opgeneem het. “Ons is baie lief vir die wildtuin en span gereeld daar uit wanneer Kurt se vol program dit toelaat. Ek het al ’n paar jaar terug die idee vir die liedjie gekry en Kurt het die liedjie toe uiteindelik op sy nuwe album opgeneem,” vertel sy. “Ons is beslis van plan om in die toekoms nog meer liedjies saam te skryf,” sê Kurt.
Kurt vertel hy tree gemiddeld drie keer ’n week op en doen altesaam sowat 180 konserte ’n jaar. “Maar ek kies ook my konserte met die hand uit. Ek het byvoorbeeld een keer ’n groot konsert van die hand gewys om by ’n troue op De Aar te sing. Die vrou wat getrou het, het vir my ’n foto gestuur waar sy as vyfjarige saam met my by ’n konsert afgeneem is en ek het gedink dit is baie spesiaal. Ek doen optredes wat my gelukkig maak. Dit gaan nie altyd vir my oor die geld of hoeveel mense in die gehoor is nie.”
Hy tree nie net in Suid-Afrika op nie en het al in verskeie lande soos Nederland, België, Australië, Dubai, Amerika, China en Nieu-Seeland sy stempel afgedruk.
Verskeie oorsese kunstenaars in België, Duitsland, Nederland en Oostenryk het al van Kurt se treffers opgeneem. Die Nederlandse sanger Jan Smit het byvoorbeeld Kurt se “Sta Op” opgeneem en sy landgenoot Henk Wijngaard het “Meisie meisie” as “Meissie meissie” in Nederlands opgeneem. Die groep Klostertaler van Duitsland het ook “Meisie meisie” in Duits opgeneem en Mickie Krause het “Kaptein span die seile” ook in Duits as “Chantal” opgeneem.
Daar is darem ook tyd vir rus. As gesin ontspan hulle die beste wanneer hulle in die bos of by die see is. “Die kinders snorkel, swem en speel op die strand.” Desembermaande is maar altyd ’n aanpassing vir hulle as gesin, omdat Kurt soos met die afgelope Desember, dwarsoor die land toer. “Ek het wel al geleer om dit so te aanvaar as jy met ’n kunstenaar getroud is,” sê Dunay. “Ek en my ma en die kinders gaan hou dan iewers vakansie.”
Dunay vertel dat wanneer Kurt wel tuis is, hulle op hul lekkerste by die huis ontspan. Kurt maak dan gewoonlik ’n hoenderpotjie of braai en sy maak ’n pampoentert. “Ons is ook regte foodies en ek en Kurt gaan eet graag saam uit, en ons voorkeurdis is gewoonlik vis of soesji.”
Wat die toekoms betref, beplan Kurt beslis ’n paar nuwe albums.
Kurt is bekend daarvoor dat hy altyd positief, professioneel en geesdriftig is. “Ek is ’n realis en as daar ’n negatiewe ding opduik, sal ek altyd ’n oplossing soek. Ek laat nie toe dat negatiewe dinge my affekteer of my energie steel nie.”
En met so ’n positiewe gesindheid kan ’n kaptein mos net nog baie ver en oor baie horisonne in die wêreld vaar.
Hierdie artikel het oorspronklik in ons Maart-uitgawe van 2025 verskyn.
Lees ook: Dokumentêre reeks: 13 goed wat jy dalk nie van Frank Opperman geweet het nie
