“Dis een ding om by iemand te pas, maar ’n heel ander ding om in iemand se wêreld in te pas,” was Reandi Grey, aanbieder van kykNET se gewilde maatsoekreeks Boer soek ’n vrou se gevoel oor die boere wat hul gekose pasmaats se familie en vriende moes ontmoet. Sy was in die kol toe sy dit ’n senutergende ervaring genoem het.
Benewens die ontmoeting met die ouers en familie, het elkeen van die boere se pasmaats ook ’n aktiwiteit vir die kuiers beplan. Hier’s hoe dit gegaan het:
Pieter (29), ’n skaapboer van Richmond
“Ja, dis nou heel anderster as ons wêreld,” het Pieter erken oor sy besoek aan Anzelle in Pretoria. Maar hy was reg vir aksie – soos om koffie te drink saam met Anzelle se ouers.
Skertsend wou haar ma weet of Pieter meer as 4 000 skape op die plaas het – anders is sy kersie geblus. Laggend het die antwoord gekom: “4 001.” En hy wou weet of die springbokke op sy plaas darem ook vir ietsie tel.
Pieter het ook ’n goeie indruk op haar pa gemaak.
“Ek dink sy pa en ma het hom mooi grootgemaak,” het hy goedkeurend laat hoor. “En hy en Anzelle lyk ook vir my happy,” was haar ma se terugvoer.
En Anzelle? Sy het gevoel hulle twee is reg vir mekaar, en sy kon nie wag dat hulle weer tyd saam kon deurbring nie.
Haar beplanning vir die dag was vir hulle twee om valskerm te gaan spring. Pieter se nerwe het maar gelol, en hy’t gesê hy gaan voorgee asof dit niks is nie.
Selfs Anzelle se senuwees was soortvan aan flarde, maar die twee se glimlagte na hul landing was baie groot.
Teen die aand se kant was dit Pieter se beurt om die res van Anzelle se familie en vriende te ontmoet. En toe die twee hand aan hand uitgestap kom, is hulle met ’n groot gejuig verwelkom.
Woorde soos “oulike couple”, “lyk of hulle bymekaar pas”, “korter as wat ek gedink het” en “daar’s iets in die lug” was deel van die gesprekke. Die aand was ’n vrolike affêre met baie gelag en gesels.
Pieter het gevoel dat hy beslis die regte keuse gemaak het. Dit was ’n diep gelukkige boer wat die aand terdeë geniet het.
Evert (38), ’n makadamia-, sitrus- en wildboer van Tshipise, Limpopo
Lauren se mense het hom baie gasvry in die Oos-Kaap verwelkom. En toe daar ’n verwelkomingsheildronk ingestel word, het Evert haar seepglad met ’n “askies, skat” om verskoning gevra. Want vanweë ’n kommunikasiefoutjie tussen die twee het Evert onbepland Lauren se pa en ook later vriende die vorige dag reeds ontmoet. Sy was seker dat enige senuwees wat kon pla, sommer klaar pad gevat het.
Min het sy geweet hoe direk haar pa met Evert sommer voor almal gaan gesels, en sy was baie ongemaklik toe hy wou weet wat dit is wat Evert tot haar aangetrokke laat voel het.
“Om net te sê sy is beeldskoon, doen haar ’n onreg aan. Want sy het ’n baie sterk karakter wat sy effens probeer wegsteek onder ’n baie goeie sin vir humor. So, ek lag verskriklik saam met haar,” was Evert se reaksie.
“She knows what she wants,” het ma Diane ferm verklaar.
“Wel, ek hoop ons sien jou meer gereeld,” was haar pa se uitnodiging aan Evert. Maar Lauren het vinnig gekeer en gesê hulle moet net eers deur die dag kom om seker te maak die uitnodiging gaan staan. Terselfdertyd was haar ma baie gelukkig om te sien dat Lauren se sprankel weer teruggekeer het.
Lauren se ouers is skaapboere, en hulle het gewonder: Wat weet ’n makadamiaboer dan nou van skaapskeer? Dit was iets wat Lauren ook wou uitvind. Later het die twee meer uitgevind oor plante in die omgewing. Hulle is ook touwys gemaak oor hoe om meringues te maak en hoe om van die veldplante daarby te inkorporeer.
Tydens die aand se kuier met familie en vriende het Lauren se pa half teësinnig erken hy kan solank vir Evert ’n halwe merkie gee. Dit mag dalk eers ’n volle merkie word wanneer Evert weer kom kuier.
Willie (26), ’n makadamia- en wildboer van Badplaas
Willie het hom op Memel bevind, waar hy Cilmari se ouers en vriende ontmoet het. Cilmari kon nie ophou glimlag nie. Dit was vir haar net te lekker om hom weer te sien. Hy was net so bly. Die beplande familiebesoek sou eers ’n dag later plaasvind, maar nie een van die twee wou langer wag nie.
Cilmari se planne vir die dag het ’n rit na die kleiduifskietbaan en perdry ingesluit. Willie kon nie sy blydskap oor die aktiwiteite beteuel nie.
Haar ouers was ook beïndruk met Willie. Vir hulle was hy bloot net homself, “amper soos ’n ander boer wat hier ingery en afgeklim het. Gemaklike indrukke gehad,” het Cilmari se pa gesê.
Haar ma het gevoel Cilmari en Willie is baie verstandig en dat hulle hierdie moontlike verhouding ’n kans wil gee, “maar ek kan definitief sien sy’s in vir die proses”.
Na die twee hul slag met teikenskiet gewys, het Cilmari haar boer met ‘n piekniek op Memeldam se wal bederf. Daarna is die twee te perd deur Memel se strate met ’n vulletjie wat ewe spelerig agterna gedraf het.
Van die ouer garde het hom later die aand as “plat op die aarde” beskryf en gesê sy ouers moet gelukgewens word, want hulle het ’n goeie seun grootgemaak. Hy het ook punte gekry daarvoor dat hy mense in die oë kyk terwyl hy met hulle gesels en reguit op vrae antwoord.
Rudi H (56), ’n boerbokboer van Windsorton
Al waarvan Rudi H seker was, was dat hy nie weet waar hy is nie en dat hy maar net kan hoop sy GPS sal hom weer daarvandaan huis toe lei. Maar van huis toe gaan was daar nog nie sprake nie. Lizelle het heelwat planne vir die dag beraam. Dit het met ontbyt begin, gevolg deur ’n masseersessie vir paartjies en nagereg vir aandete. Oe-la-la!
Wat Rudi H waardeer het, was dat Lizelle se menswees dieselfde gebly het nadat die ander potensiële pasmaats hul tasse gepak het. Hulle kommunikeer en bel mekaar gereeld.
“Nee, sy’s agtermekaar,” het hy verklaar.
Lizelle het vir Rudi H teen die koppie laat uitklim vir ’n lieflike uitsig oor Johannesburg. Rudi H het erken hy’s al amper reg om te hardloop – met ander woorde, om deel te neem aan die wedloop om Lizelle se hand. Daar was egter nog baie risiko’s en onsekerhede waaroor eers duidelikheid gekry moet word.
Tuis het sy reeds ’n malvapoeding in die oond gehad en moes Rudi H self ook ’n voorskoot aansit. Lizelle het hom aan haar familie en vriende voorgestel as “my boer, Rudi”. Hulle het gevoel die interaksie met hom was baie gemaklik en die algemene indruk was dat hy besonder goed ingeskakel het.
Haar twee kinders veral was bly om hul ma gelukkig te sien. Rudi H was net so beïndruk met haar familie en vriende en het gesê hy sal graag weer wil kuier en meer van haar mense wil ontmoet.
Rudi (47), ’n toerisme- en wildboer van Beestekraal
Vir Hannes was die week op die plaas vol spanning, en hy het besluit om ’n spadag vir hom en Rudi by Feather Hill naby Potchefstroom te reël.
Kuiertyd met Hannes se vriende het ook goed afgeloop. Daar was uitroepe van skok toe Rudi vertel dat Hannes byna-byna deur ’n wildebees geskraap is die week vantevore, maar nie lank daarna nie het almal heerlik oor sy noue ontkoming gelag.
Alhoewel Rudi baie selfvertroue het in sy gewone omgang met mense, het hy erken hy was effe senuweeagtig om Hannes se familie en vriende te ontmoet.
“Hannes lyk baie anders – Hannes is verlief,” het van sy vriendinne onmiddellik opgemerk. Wat Rudi vir lank sal onthou, is hoe tuis hy gevoel het ten spyte van sy aanvanklike senuweeagtigheid.
“Ek dink hier’s ’n baie sterk, positiewe toekoms. Ek dink rêrig so, uit my hart uit,” het Hannes gesê.
Die reeks word op Donderdae om 20:00 op kykNET (DStv-kanaal 144) uitgesaai en is ook op DStv Stream en Catch Up beskikbaar.
Lees ook: PAS BEKEND | Ontmoet Kokkedoor: Son & see se deelnemers!
