Krakerige (en verslawende) uieringe
genoeg vir 4
Panko is Japanse broodkrummels. Die groot vlokkies bak lekker krakerig en goudkleurig.
• 2 groot uie, dik gesny
• 100 g koekmeel
• 30 g mielieblom
• sout en swartpeper
• 1 eier
• 180 ml (¾ k) melk
• 100 g panko-broodkrummels (kry dit by Woolies, of gebruik vars broodkrummels)
• sonneblomolie vir diepbraai
• seesoutvlokkies
1 Meng die koekmeel en mielieblom in ’n vlak mengbak. Geur met sout en swartpeper.
2 Klits die eier en melk in ’n ander vlak mengbak. Sit die broodkrummels in ’n ander vlak bakkie.
Voorverhit die olie in ’n diep kastrol of groot pan tot 190 °C.
3 Bedek die uieringe in sarsies met die meelmengsel, dan die eiermengsel en druk laastens in die broodkrummels tot die uie goed bedek is.
4 Braai die uieringe vir 2-4 min. in die olie, of tot goudkleurig en krakerig. Dreineer op kombuispapier en geur met seesout.
Klik hier vir die beste frikkadelle en burgerbroodjies
Mexikaanse salsa
genoeg vir 4
• 2 avokado’s, geskil en in blokkies gesny
• 100 g kersietamaties, in blokkies gesny
• ½ rooi-ui, fyn gekap
• 1 groen brandrissie, fyn gekap
• hand vol koljander, fyn gekap
• uitgedrukte sap van 2 lemmetjies of
1 suurlemoen
1 Meng al die bestanddele liggies en geur met sout na smaak.
Dun en krakerige tjippies
genoeg vir 4
• 2 groot aartappels
• sonneblomolie vir diepbraai
• seesout
1 Voorverhit die sonneblomolie in ’n diepbraaipan of groot pan tot 190 °C.
2 Sny die aartappels met ’n mandoliensnyer of skerp mes in baie dun (9 mm) skywe. Sny die aartappelskywe dan in dun repies.
3 Braai die aartappelskyfies vir 5-6 min. of tot goudbruin in die olie. Dreineer op kombuispapier. Geur met seesout.
Kool-en-beet-slaai
genoeg vir 4
• 1 wortel, geskil en in dun repies gesny
• 1 rooi beet, geskil en in dun repies gesny
• ½ klein rooikool, dun gesny
• ½ klein groenkool, dun gesny
• ½ rooi-ui, dun gesny
• hand vol koljander, fyn gekap
• 15 ml (1 e) sojasous
• 15 ml (1 e) soetrissiesous
• 5 ml (1 t) lemmetjiesap
1 Meng die wortels, beet, kool, rooi-ui, koljander, sojasous, soetrissiesous en lemmetjiesap in ’n mengbak.
Radys-en-komkommer-piekel
genoeg vir 4
• 10 ml (2 t) appelasyn
• 15 ml (1 e) suiker
• 6 radyse, dun gesny
• ½ rooi-ui, dun gesny
• 4 babakomkommers, in linte geskil
1 Meng die appelasyn en suiker in ’n klein kastrol oor matige hitte. Bring tot kookpunt en haal van die hitte af.
2 Meng die radyse, rooi-ui en komkommer in ’n bakkie. Voeg die asynmengsel by en meng goed deur.
