Die geliefde reisskrywer Casparus Johan Bakkes, oftewel C. Johan Bakkes is Dinsdagaand na ‘n lang stryd met kanker oorlede. rooi rose het verlede jaar met hom gesels.
Deur Elna Rossouw
Waar kom jou liefde vir reis, avontuur en stories vertel vandaan?
Dis seker in die DNS. My pa het my aan die natuur en daarmee gepaardgaande avontuur blootgestel, my ma aan stories. Later het die lees van boeke oor vêr plekke die reis genoop.
Hoe pak jy nuwe boeke aan?
Ek “pak” nooit nuwe boeke aan nie. Die boek pak homself aan … as ek genoeg gereis het.
Jou ma was die skrywer Margaret Bakkes. Jou pa, Cas, ’n gerekende geskiedkundige. Loop skrywersink deur die are van die familie?
Ek rapporteer slegs oor die waarheid en dit wat beleef is. Ek is nie slim genoeg om fiksie uit te dink nie. Gegewe my afarmbroer Christiaan (’n skrywer met ’n stapel boeke oor die natuur en avontuur agter die blad), en my broer Marius (’n bekende joernalis en TV-vervaardiger) meen ek so. Hoewel ek myself − gegewe die literêre – nie as deel van die Brontë-gesinnetjie ag nie.
(Foto:Verskaf)
Kry jy ooit iets soos skrywersblok?
Ek skryf nie om den brode nie. Jy kry skrywersblok as jy moet skryf en jou senuwees gee in. Dit het my nog nie oorgekom nie. Blok myself!
Wat is vir jou die moeilikste deel van die skryfproses?
Ek is eerstens ’n reisiger en dan ’n skrywer. Die skryf oor die reis is ’n byproduk, bloot om my gedagtes te orden. Ek is wel moerse in my noppies dat lesers daarvan hou. Daar is dus geen skryfproses nie. Ek pen my onthou in kroeë neer, gefortifiseer deur ’n flessie Kaapse wit.
Hoe lyk ’n dag in jou lewe?
Dit wissel van dag tot dag. As afgetredene: slaap ek in; beplan vir wat ook al; laatmiddag steek ek ’n vuurtjie aan, knak ’n fles en braai iets. Op reis: rol my bedrol op; breek kampplek af en maak seker dat niemand sal weet iemand was hier nie; sit ’n stukkie Heino-musiek op die kajuitspelertjie; knak ’n bier en neuk na iewers en nêrens.
Wat lees jy graag?
Ek lees graag raaisel-, riller-, speur- en spanningsverhale met so ’n titseltjie romanse. Daar is geen beter verbeeldingsvlug as om in ’n whodunit verstrengel te raak nie.
Wat lees jy glad nie?
Enigiets wat na literêre hoogtes neig. Dít wat jy twee keer moet lees, oordink en herdink voor jy verstaan wat die skrywer bedoel. Ek gaan nie voorbeelde noem nie, want party van hulle lewe nog.
Wat is die beste boek wat jy nog gelees het, en hoekom sê jy so?
Daar is ten minste twee: FA Venter se Man van Cirene. Gegewe die inligting in drie verse van die Bybel se Nuwe Testament, skryf die man ’n hele boek! Dan, PG du Plessis se Fees van die ongenooides. Geen skrywer kon die onreg wat die Britse Ryk wêreldwyd aan “sy onderdane’ “gepleeg het, só vasvat nie.
Wie is jou gunstelingskrywers?
Robert B Parker, James Lee Burke en Deon Meyer.
Hoe bederf jy jouself ná ure se skryfwerk?
Die letterlike skryf van ’n bundeltjie ervaringe behoort nie langer as vier weke se wakkerbly-ure te wees nie. Dan bederf ek myself deur in my bakkie te klim en horisonne te gaan soek.
(Foto: Verskaf)
As jy ’n ander beroep kon kies, wat sou dit wees?
Presies dieselfde of miskien ’n beroepsboemelaar.
Lees ook: Steven Kitshoff maak hart oop oor sy skok-uittrede op Laataand by Rian
