Gesonde rotskoekies

Bestanddele

• 325 ml (225 g) koekmeel
• ’n knypie sout
• 5 ml (1 t) koeksoda
• 200 g botter
• 1 eier
• 125 ml (½ k) fyn klapper
• 230 g witsjokolade, ruweg gekap
• 100 g pekanneute, ruweg gekap
• 100 g bosbessies
• 100 g ekstra witsjokolade, vir versiering

Metode

Voorverhit die oond tot 180 °C en spuit ’n bakplaat met kleefwerende kossproei.

1. Sif die meel, sout en koeksoda in ’n middelslag-mengbak.
2. Room die botter tot sag en voeg die eier by. Voeg die gesifte droë bestanddele by en meng goed.
3. Meng die klapper, sjokolade, neute en bosbessies by.
4. Skep lepels vol van die deeg met 2 teelepels op die bakplaat. Bak vir 15-20 min. tot die koekies verkleur. Sit op ’n afkoelrak en laat heeltemal afkoel.
5. Smelt die res van die sjokolade en drup die gesmelte sjokolade met ’n lepel oor die afgekoelde koekies.
6. Laat staan vir 10 min. tot die sjokolade hard en droog is en bêre die koekies in glashouers.

Nog idees: Donker rotskoekies

Maak die deeg aan soos hierbo maar vervang die witsjokolade, bosbessies en pekanneute met 230 g donkersjokolade, ruweg gekap
100 g amandelvlokke
100 g dadels, in stukkies gesny
100 g ekstra donkersjokolade vir versier

of …

Tropiese rotskoekies

230 g witsjokolade, ruweg gekap
100 g grondboontjies, ruweg gekap
100 g droë mango en pynappel, in stukkies gesny
100 g ekstra witsjokolade vir versiering