Verskaf deur
Gesprekke oor veroudering het dekades lank gefokus op wat ons glad kan maak, verbloem of terugdraai. Maar gesonde veroudering strek veel verder as hoe ons van buite af lyk. Die gesprek verskuif toenemend na hoe sterk ons voel, hoe goed ons beweeg en herstel, en tot hoe ’n mate ons voluit aan die lewe kan deelneem soos die jare verbygaan.
Deborah Good, die stigter van die Suid-Afrikaanse welstandhandelsmerk Youthology, vertel die strewe na ewigdurende jeug het haar nog nooit gefassineer nie. “Wat my wel fassineer, is die moontlikheid om ten volle by die lewe betrokke te bly namate die jare verbygaan. Die vraag is nie hoe oud ons word nie, maar hoe lewendig ons bly.”
Krag gaan oor meer as net tyd in die gimnasium
Dit word al hoe belangriker om spiere te behou namate ons ouer word. Veroudering gaan gepaard met ’n geleidelike afname in spiermassa en -krag; en daarom is weerstandsoefeninge noodsaaklik vir die behoud van beweeglikheid, balans, fisieke funksionering en onafhanklikheid.
Kragoefeninge gaan nie noodwendig daaroor om swaarder gewigte op te tel of jou liggaamsbou te verander nie. Dit kan gemeet word aan alledaagse vermoëns: om van die vloer af op te staan, inkopies te dra, trappe te klim, te reis of om steeds aktiwiteite te geniet wat vir jou belangrik is.
Weerstandsoefening kan baie vorms aanneem, van gewigte en weerstandsbande tot oefeninge wat slegs van jou eie liggaamsgewig gebruik maak. Die sleutel is om ’n geskikte vorm van beweging te vind waarmee jy kan volhou, en om, waar nodig, professionele begeleiding te kry.
“Die werklike waarde was nooit jeugdigheid nie. Dit was lewenskrag. Nuuskierigheid. Krag. Teenwoordigheid,” sê Deborah. Foto: Verskaf
Vir Deborah gaan dit oor wat krag ons in staat stel om te doen. “Die werklike waarde was nooit jeugdigheid nie. Dit was lewenskrag. Nuuskierigheid. Krag. Teenwoordigheid. Die opwinding om wakker te word met mense om lief te hê, plekke om te verken, betekenisvolle werk om te doen, en die gevoel dat die lewe steeds op pragtige en onverwagte maniere ontvou.”
Beweeg, maar onthou om te herstel
Stap, swem, fietsry, kragoefening, Pilates en joga kan alles fisieke vermoë en beweeglikheid ondersteun. Maar beweging is slegs een deel van die prentjie. Herstel is ook belangrik.
Oefening verskaf die stimulus vir die liggaam om aan te pas, terwyl slaap, rus, bevogtiging en voldoende voeding die liggaam die geleentheid gee om dit te doen. Herstel is nie net vir topatlete van belang nie; werkstres, swak slaap, oefening en ’n besige lewe plaas alles druk op die liggaam.
“Ek wil mense help om so lank as moontlik ‘ja’ vir die lewe te sê,” sê Deborah. Rus staan in hierdie opsig nie apart van vooruitgang nie. Dit is deel van hoe ons die vermoë behou om aan te hou.
Voeding verskaf die boustene
Daar is geen enkele voedsel-, aanvullings- of welstandsneiging wat gesonde veroudering kan waarborg nie. ’n Gevarieerde, gebalanseerde dieet bly fundamenteel en verskaf die energie en voedingstowwe wat die liggaam nodig het om te funksioneer en homself te onderhou. Proteïen is veral relevant vir die instandhouding van spiere, terwyl vrugte en groente, volgraan, gesonde vette en voldoende bevogtiging alles tot die groter prentjie bydra.
Soos ons ouer word, kan voedingsbehoeftes verander, en aanvullings wat sorgvuldig gekies is, kan deel vorm van ’n breër benadering tot welstand. Kollageen kan byvoorbeeld as deel van ’n gesonde verouderingsroetine beskou word namate die liggaam se natuurlike kollageenproduksie afneem. Aanvullings moet die fondamente aanvul eerder as vervang: goeie voeding, gereelde beweging, voldoende slaap en herstel.
Deborah Good. Foto: Verskaf
Deborah sê die belangrikste verskuiwing lê in hoe ons oor ouerword dink. “Veroudering is nie iets om teen te veg nie. Dit is iets om so goed moontlik te doen.”
Gesonde veroudering gaan dalk nie daaroor om die tyd suksesvol terug te draai nie, maar om die krag, energie en vermoë te behou om voluit te bly lewe namate die tyd aanstap.
Lees ook: Die hormoon wat oorgesien word
