Wat jy van bokwiet moet weet, en hoekom jy dit nou moet eet deur Salomé Delport.
Wat is bokwiet (buckwheat)?
Al lyk die meel soos koringmeel en die saadjies soos koeskoes of bulgur is dit nié verwant aan koring nie.
Bokwiet is uitstekend vir veganiste en almal wat gluten moet vermy.
- Dit kom van ’n plant met die naam Fagopyrum esculentum – ’n heeltemal ander gewas as die Triticums waarvan koringmeel en selfs speltmeel en durumprodukte gemaak word. Anders as koring, wat as ’n grasgewas beskou word, het die bokwietplant groot blare soos ’n aartappelplant. In die blomseisoen is ’n bokwietland oortrek met wit of pienk blommetjies.
- Bokwietsaad word net soos rys of hawermout gaargemaak deur dit te kook. Vir ekstra geur kan jy die saadjies vooraf vir 2-3 minute in olyfolie of botter roerbraai. Geniet die saad (of groats) soos pap met melk en ’n bietjie suiker, of soos rys, pasta of noedels as deel van jou hoofgereg.
- Bokwietmeel is gemaalde bokwietsaad. Jy kan daarmee bak. Die beste is om dit te gebruik vir gebak wat nie hoog moet rys nie, soos kleinkoekies, kraakbeskuitjies en pannekoek. Sonder gluten wat gebak elastisiteit gee en help vorm hou, kan groot koeke platval. Die Franse galette, Nederlandse poffer en Russiese blini is tradisioneel met bokwietmeel gemaak.
- Bokwietnoedels, of soba in Japannees, is ’n baie dun, bruinerige noedel wat van bokwietmeel gemaak word.
- Bokwiet is voedsaam, met soveel plantproteïen in ’n koppie bokwietsaad as in ’n eier. Bokwiet is werklik ’n besonderse graan omdat dit een van die min plantprodukte is wat jou ’n volledige proteïen gee, met ander woorde dit bevat al die essensiële amino-sure wat jou liggaam nie kan maak nie. Dit is dus ideaal vir veganiste. Eintlik moet ons almal ’n deel van ons diereproteïene soos tjoppies en wors deur plantproteïene soos hierdie vervang.
- Dit bevat ook besonder baie B-vitamiene, magnesium en vesel.
- Die blommetjies simboliseer liefde wat nooit verander nie.
Vir nog interessante feite, loer hier
