Tawwe tiemie
• Jy kry verskeie variëteite met unieke geure, soos suurlemoentiemie wat varsheid gee en heerlik is in soeter gebak en drankies. Gewone tiemie gee ’n diep geur aan soutgeregte.
• Omdat tiemie so gehard is, droog dit beter en behou sy geur goed.
• Dié krui is ewe nuttig vir die noodhulpkissie: gorrel met sterk tiemietee om keelinfeksie teë te werk, of behandel velkwale daarmee.
2 blitsidees
Klassieke bouquet garni – vir hoender
• Bind 5 takkies pietersielie, 1 lourierblaar en 4 takkies tiemie met 1 preiblaar vas.
• Sit dit in die holte van ’n heel hoender en rooster.
Suurlemoen-en-roosmaryn-bouquet garni – vir lam
Bind 1 lourierblaar, 5 takkies pietersielie, 4 takkies tiemie en 2 takkies roosmaryn met ’n repie suurlemoenskil vas en gebruik in lamsvleisbredies.
Tiemie se geurpasmaats
Knolgroente, peulgroente, lamsvleis, steak, eiervrug, kool, wortels, preie, eksotiese sampioene, tamaties, uie, aartappels, blomkool, soetmielies, knoffel, lemoene, suurlemoene, pere, ricotta, botter en rooibos.
Koop só
• Droë tiemie moet steeds ’n sterk geur hê wanneer jy die botteltjie skud, of die blare tussen jou vingers vryf.
• Wanneer jy vars takkies koop, moet hulle nie swart of gekneus wees nie.
• Koop geure soos suurlemoentiemie by kwekerye – hulle groei goed in potjies op die kombuisvensterbank.
Bêre só
• Pluk vars tiemie wanneer daar oorvloed in die tuin is en hou die stammetjies in water in die yskas, of op klam kombuispapier in ’n sakkie in die yskas.
Maak só
Droog tiemie tuis:
• Sit die blare op kombuispapier en mikrogolf vir 2-3 min. op hoog
• Hang bossies in ’n droë vertrek op en stroop die blaartjies af wanneer hulle droog is. Hou in ’n lugdigte houer.
• Kap die blaartjies fyn en vries in ’n bietjie water om by soppe of bredies te voeg.
Gebruik só
• Stroop die blare van die takkies en vryf oor vleissnitte voor jy dit rooster.
• Sit takkies suurlemoentiemie in drankies soos yskoue rooibos-ystee en jy het ’n verfrissende somerdrankie.
• Gedroogde tiemie is gehard en kan lank kook. Gooi dit vroeg by die pruttende pot en kry die beste geur.
• Tiemie is deel van die klassieke bouquet garni waarmee jy bredies en soppe geur.
Lees Meer
