Die 7de Laan-span het pas aangekondig dat hul vierduisendste episode op Donderdag, 9 Maart 2017 om 18:00 uitgesaai word.
Die langverwagte episode is opgeneem op 18 Januarie 2017. Dit is ook vanjaar die sepie se sewentiende jaar op lug, en die eerste episode is op 4 April 2000 uitgesaai. Maande se voorbereiding en beplanning ten opsigte van elke aspek van dié groot episode verseker dat dit ’n onvergeetlike episode sal wees.
7de Laan het hul aanhangers verseker dat episode 4000 skouspelagtig sal wees met ’n storielyn vol intrige wat jou op die punt van jou stoel sal hou. Die episode begin in ’n romantiese omgewing waar Xander en Vanessa regmaak vir hulle troudag. ’n Paar bekende gesigte kom kuier ook in Hillside vir die spesiale geleentheid …
“Ons het nog nooit iets soos hierdie gedoen nie en hierdie episode is ’n vertoonvenster van hoe ver 7de Laan werklik die laaste sewentien jaar gekom het,” sê die vervaardigers.
Die sepie verwelkom ook een van Suid-Afrika se bekende R&B-sensasies, Keabetswe Motsilanyane, in haar nuwe rol as Lesedi, ’n 36-jarige, vurige en invloedryke prokureur met ’n reputasie. Lesedi daag in Hillside op om Cecile, die ma van Vince se geliefde kind Christopher, te verteenwoordig. Lesedi is intelligent en toegewyd aan haar loopbaan en sal onvermoeid veg vir sake waarin sy glo, maar sy droom steeds daarvan om eendag haar eie familie te hê en ware liefde te vind. KB, bekend vir haar rol as Lucilla Vilakazi op die eTV- sepie, Rhythm City, is vasberade om haar toneeltalent na die Laan te bring. Sy sluit aan by die span vaste akteurs.
Lees Meer
