Verskaf deur kykNET&kie
In Skemergrond is daar dié Augustus min ruimte vir halwe maatreëls. Sommige inwoners is bereid om groot risiko’s te neem om die waarheid bloot te lê, ander jaag nuwe geleenthede na, terwyl enkeles ontdek dat goeie bedoelings soms meer probleme veroorsaak as wat hulle oplos.
Hoe ver is te ver om die waarheid te kry?
Amber, Ruan en Lily se verhouding word tot die uiterste beproef wanneer hul ondersoek na Isaac al gevaarliker raak. Terwyl Amber toenemend bereid is om risiko’s te neem om die waarheid bloot te lê, raak Ruan al meer verskeurd tussen sy plig om Isaac vas te trek en sy verantwoordelikheid teenoor die mense vir wie hy omgee. Lily begin vermoed dat iets vir haar weggesteek word, en geheime, wantroue en roekelose besluite plaas al groter druk op hul verhoudings.
Kevin se nuwe obsessie
Kevin bevind hom op ’n onverwagte missie wanneer sy nuuskierigheid oor die geheimsinnige Raffie G in ’n volskaalse obsessie ontaard. Wat as ’n eenvoudige belangstelling begin, ontwikkel vinnig in ’n ondersoek wat sy geduld, sy verhoudings en selfs Gloria se verdraagsaamheid toets. Kevin delf al dieper en ontdek dat die waarheid nie altyd is wat hy verwag het nie.
Christine speel weer volgens haar eie reëls
Vir Christine bring Augustus nuwe uitdagings én nuwe geleenthede. Terwyl sy probeer herstel van terugslae en om haar maatskappy se toekoms te beveilig, word sy gekonfronteer met sakebesluite wat alles kan verander. Christine is egter nie iemand wat maklik volgens ander mense se reëls speel nie, en haar vasberadenheid om beheer te behou stuur haar op ’n pad vol risiko’s, ambisie en nuwe planne.
Tillie se nuwe lewe is nie so eenvoudig nie
Ná haar troue met Manny sukkel Tillie om haar plek te vind tussen Lang Verloren, die hotel en haar nuwe lewe as getroude vrou. Tillie bevind haarself tussen ou verantwoordelikhede en nuwe verwagtinge. Haar goeie bedoelings lei dikwels tot ongemaklike situasies, oorskryde grense en moeilike keuses.
Terwyl sommige inwoners antwoorde soek, ander nuwe geleenthede najaag en enkeles probeer uitvind waar hulle werklik hoort, bring Augustus groot draaipunte vir die mense van Gemoedsdrif. Die besluite wat nou geneem word, gaan nog lank nagevolge hê.
Skemergrond word Maandae tot Donderdae om 19:30 op kykNET&kie (DStv-kanaal 145) uitgesaai en is ook op DStv Stream en Catch Up beskikbaar.
