1. Wanneer jy dink aan natuurlike kleure, dink jy eerste aan wit, swart en beige. Maar moenie van grys vergeet nie! Daar is nie baie reëls as dit kom by grys nie. Grys is een van die kleure wat by alles pas. Al wat jy hoef te doen, is om die regte skakering te vind wat by jou velkleur pas.
2. Mense met ligte velle lyk goed in ligte grys, maar kan ook donker grys dra. As jy ’n warm velkleur het, moet jy meer versigtig wees. Ligte skakerings van grys kan jou afgemat laat lyk. Dra eerder ’n donkerder grys.
3. Grys is ’n sagter alternatief vir swart en eintlik makliker om te dra as jy ’n bietjie ouer is. Dit is ’n ongelooflik veelsydige kleur wat jy op baie verskillende maniere kan dra.
4. Jy kan verskillende skakerings van grys saam dra. Soos Olivia Palmero. Speel met teksture om die uitrusting interessant te maak.
5. Grys lyk veral goed saam met sagte pastelle soos geel en pienk. Dit werk net so goed saam met helder kleure, wat die kleur ’n vars en moderne voorkoms gee. Grys en ligte pienk skep ’n sagte, romantiese en klassieke voorkoms. Dra ’n fyn gebreide trui of top in ligpienk saam met ’n grys broek of romp.
6. Grys kan of baie formeel wees en werk toe gedra word, of jy kan dit down dress vir naweke. ’n Grys broek of noupassende romp saam met ’n wit hemp sal altyd ’n klassieke opsie wees vir werk. En jy kan nie verkeerd gaan met ’n grys broek met ’n trekkoord, of ’n grys denim saam met ’n wit t-hemp vir naweke nie.
7. Volgens Business Insider Australia sê dit die volgende van jou as jy grys dra na ’n werksonderhoud: “Dit wys dat jy onafhanklik is, wat nie ’n slegte ding is nie, solank jy wys dat jy selfversekerd is. Dit wys ook dat jy ’n individu is wat selfonderhoudend is en in staat is om op jou eie te dink.
8. Grys werk ewe goed saam met swart en neutrale bykomstighede.
