Watter medisyne is die beste vir my verkoue?

Niks kan jou verkoue oornag laat verdwyn nie. Maar met die regte medisyne kan jy darem beter voel.

Wat moet jy drink?
Verkoues verskil van mekaar: party laat jou nies en nies, terwyl ander eerder jou keel seer laat voel of jou laat hoes totdat dit voel asof jou ribbes wil breek.

Kyk die lysie (tabel onder) deur, sodat jy die soort kies wat die beste by jou simptome pas.

Verkouemiddels kan net een of ’n kombinasie van bestanddele bevat wat elkeen op sy eie manier jou verkoue help. Maar daar is ’n horde soorte op die rak – en elke jaar kom nuwe name by. Gelukkig, of ongelukkig, is daar nie werklik nuwe aktiewe bestanddele in die middels nie. Dus kan jy maar net die invoegsel lees, of op die houer kyk om die aktiewe bestanddele op te spoor. Besluit dan watter van jou simptome pla jou die meeste. Kies op grond daarvan die middel wat jou spesifieke simptome gaan verlig.

Die verkouesimptoom wat jou die meeste pla	Die soort verkouemiddel wat daarvoor help
Jy nies baie, jou neus loop, jou oë traan en jy het ’n postnatale drup	Kies ’n verkouemiddel met ’n antihistamien
Jou neus is toe en jou sinusse is seer	Kies ’n verkouemiddel met ’n dekongestant
Jy hoes swaar, nat hoese	Kies ’n verkouemiddel met ’n ekspektorant
Jy hoes onophoudelik maar dit is ’n droë hoes en jy hoes niks uit nie	Kies ’n verkouemiddel met ’n hoesonderdrukker. Gebruik egter jou goeie oordeel: as jy niks uithoes omdat jou slym te dik is moet jy eerder ’n ekspektorant gebruik
Jy haal swaar asem, asof jy asma het	Kies ’n verkouemiddel met ’n bronchodilator. Gebruik egter jou goeie oordeel. As jy swaar asemhaal,het jy moontlik bronchitis of longontsteking. Altwee is ernstige komplikasies na ‘n verkoue. Gaan eerder dokter toe, veral as jy koorsig is