Geroosterde peer-en-amandel-koek

Resep deur Vickie de Beer. Foto: Lee Schwagele crphotographic.co.za

Genoeg vir 8

Bestanddele

• 4 klein pere, afgeskil en middeldeur gesny, ons het die klokhuise gelos, maar jy kan dit uithaal
• 2 e (30 ml) olyfolie
• ½ k (125 ml) heuning
• ’n hand vol vars tiemietakkies
• 200 g bruismeel
• 4 t (20 ml) bakpoeier
• 4 t (20 ml) fyn gemmer
• 200 g strooisuiker, plus ekstra om oor te sprinkel
• 200 g amandelmeel
• 4 e (60 ml) vars tiemie, blare afgestroop
• 6 eiers, liggies geklits
• 200 g botter, gesmelt
• ½ k (125 ml) geglaseerde gemmer in stroop, gedreineer en ruweg gekap
• 3 e (45 ml) gevlokte amandels

Metode

1. Voorverhit die oond tot 200 ˚C. Spuit ’n 25 cm-losboomkoekpan deeglik met kossproei.
2. Sit die pere op die bakplaat. Bedruip liggies met olyfolie en heuning en sprei die tiemietakkies bo-oor uit. Rooster die pere vir sowat 30 min. Draai hulle elke 10 min. om sodat hulle aan albei kante karamelliseer. Haal uit en laat afkoel.
3. Verlaag die oondtemperatuur tot 180 ˚C.
4. Sif die bruismeel, bakpoeier en gemmer in ’n mengbak. Voeg die suiker, amandelmeel en tiemie by en meng goed.
5. Maak ’n holte in die middel van die droë bestanddele. Voeg die eiers, botter en geglaseerde gemmer by die droë bestanddele en meng goed.
6. Gooi die mengsel in die voorbereide koekpan, rangskik die pere op die koekbeslag en strooi die gevlokte amandels oor die deeg maar nie op die pere nie.
7. Bak vir 45-50 min. of tot goudbruin en ’n toetspen skoon uitkom.

Lees ook: Appel-peer-en-karamel-tert

Lees ook: Peer-en-okkerneut-koekies

Lees ook: Goue amandel-peertjies & sjokolade-vrugtetertjies