Die aantreklike aksiester Gerard Butler (300, Den of Thieves) speel die rol van Stoick the Vast in How To Train Your Dragon, die werklike weergawe (live action) van ’n suksesvolle animasie-reeks wat vir ’n Oscar genoem is. Hierdie goedvoelfliek, wat op die boekreeks deur Cressida Cowell gegrond is, is die perfekte teenmiddel vir die toestand waarin die wêreld tans is.
(Foto: Kevin Winter/Getty Images)
Die werklike aksiefliek (live action) gaan oor ’n seun en ’n draak, maar ondersoek die pynlike ervaring wanneer ons nie aan mense se sienings van ons voldoen nie. Die rolprent kyk na verbintenis pleks van verdeeldheid, terwyl dit ook die druk ondersoek wat ouers op kinders kan plaas.
Hiccup (Mason Thames) is die seun van Stoick the Vast, ’n Viking-leier wie se dorp deur drake aangeval word. Die maer kind, intellektueel en lomp, se onbekwaamheid plaas hom in gevaar in hul gevaarlike wêreld. Om homself aan sy pa te bewys, skep Hiccup ’n toestel om ’n Night Fury-draak (die mees seldsame van al die drake) plat te trek, maar verwond die draak eerder sodat hy nie kan vlieg nie. Eerder as om die draak dood te maak, vorm hy ’n band met die draak, noem hom Toothless, en maak ’n spesiale aanhegsel om die draak te help vlieg. Die band tussen seun en dier is kostelik en die visuele elemente is eg aan die geanimeerde flieks en oortref dit.
(Foto: Lia Toby/Getty Images)
Gerard, wat bekend vir sy rolle in aksieflieks wat intelligensie én spierkrag verg, bring ’n kleuryke innerlike lewe na die hoofman wat ’n enkelouer is en probeer om werk te balanseer (die dorp bestuur en drake doodmaak) terwyl hy ook sy seun inspireer om in sy voetspore te volg. Die twee het min in gemeen en hul hart-tot-hart-gesprekke sal weergalm by enige ouer wat sukkel om met hul tiener te bind. Die geselsies is ook baie snaaks.
Gerard het aanklank gevind by die gesinsdinamika van die fliek. Die Skot, wat in Kanada gebore is, het nie sy pa gesien terwyl hy grootgeword het nie, aangesien sy ouers geskei is toe hy twee was, en sy ma met hul drie kinders na Skotland teruggekeer het. Gerard het sy pa eers weer as tiener ontmoet. Om ’n enkelouer en ’n vervreemde pa uit te beeld, het hom na aan die hart gelê. Hy het erken dat ’n groot deel van sy lewe as Stoick juis was om Hiccup se lewe te leef.
Gerard het persoonlike trauma verduur terwyl hy die fliek verfilm het. Hy vertel dat hy hom met die rol van Hiccup vereenselwig het, nie net omdat hy deur sy ma grootgemaak is nie, maar omdat hy gevoel het dat hy haar teleurgestel het. Hy het regte studeer al wou hy ’n akteur wees. Toe hy afgedank is, het sy ma vir hom ’n brief geskryf wat gesê het: “Solank jy gelukkig is, is ek trots op jou en lief vir jou.” Die akteur het tydens die Los Angeles-perskonferensie in trane uitgebars toe hy die storie gedeel het.
Tydens die verfilming van How To Train Your Dragon was sy ma besig om te sterf. Hy het elke naweek van Belfast af gevlieg waar die fliek verfilm is om by haar te wees, en dan teruggekeer na die stel om die pa te vertolk wat nie met sy seun oor die weg kon kom nie, en sy hartseer in die rol uitgestort.
(Foto: Jamie McCarthy/Getty Images for Tribeca Festival)
Butler, bekend as Gerry, het vir Rooi Rose gesê: “Hierdie rol gaan oor ’n man wat vir sy mag bekend is, en oopgebreek word. Hy skuil agter dissipline en ’n vegtersgees en besef dat dit nie is wie hy is nie, en verander sy weë.”
“As ’n diereliefhebber (hy het sy hond, Shuska, gered terwyl hy ’n fliek in Bulgarye verfilm het) was ek bewus van die effek van Stoick se gedrag op hierdie intelligente wese. Maar Stoick se onsensitiwiteit en gevoelloosheid het die slot van die rolprent des te meer aangrypend gemaak, wanneer hy sy foute erken en kies om te verander.”
Die sagmoedige akteur sluit af: “Die fliek beklemtoon dat net soos toksisiteit van geslag tot geslag oorgedra kan word, só kan liefde en verwondering ook oorgedra word. Die boodskap skram nie weg van die uitdagings en die duisternis nie, maar gee ook aandag aan verwondering. Dit maak dat gehore nie net hulself geniet nie, maar ook wyser daar wegstap en dink: ‘Miskien moet ek meer na my kind luister …’”
KYK | Margaret gesels met Gerard Butler
Volg Margaret op Youtube, Facebook, Twitter en Instagram!
Lees ook: Sterstut Ruan Smith ruil sy rugbystewels in vir ’n soektog na liefde in Op my eish!
