Die Suid-Afrikaanse aktrise Terry Pheto is Sondagaand vir drie toekennings genomineer vir die vierde amptelike International Achievement Recognition Awards (IARA) wat op 2 September sal plaasvind. Sy is genomineer as Beste aktrise vir haar hoofrol as Naledi Khama in die film A United Kingdom, vir Beste aktrise in ‘n TV of Drama-reeks vir haar rol as Winnie Mandela in die mini-reeks Madiba én vir Beste internasionale aktrise in 2017.
Die 36-jarige filmster wat haar debuut gemaak het in die rolprentverwerking van Athol Fugard se Tsotsi het daarna in verskeie Suid-Afrikaanse films en reekse verskyn. Sy het later Hollywood toe getrek om nog geleenthede na te jaag. Van 2011 tot 2013 het sy gereeld die rol van Dokter Malaika Maponya vertolk in die alombekende sepie The Bold and the Beautiful. Sy het intussen in verskeie rolprente en reekse verskyn en is op die oomblik ook ambassadeur vir die luukse horlosiehandelsmerk Longines.
Terry het op Instagram gedeel dat sy geëerd voel oor die erkenning wat sy ontvang:
Sy is menigte male hierdie jaar genomineer vir pryse, onder andere by die Black Reel Awards vir beste aktrise in ’n TV-reeks. Haar rits erkennings hierdie jaar maak haar die mees genomineerde aktrise van 2017. Ons hou duim vas dat sy hierdie keer met al drie pryse wegstap.
