Genoeg vir 6
Die brandewyn word aan die brand gesteek, of soos die Franse sê, “flambé”. Hou die vuurhoutjies byderhand en maak eers die brandewyn warm om te verseker dat dit sal brand.
Bestanddele
- 45 ml (3 e) olyf- of avokado-olie
- sout en gemaalde swartpeper
- 1,5 kg lamsboud (sonder skenkel)
- 60 ml (¼ k) brandewyn
- 20 knoffelhuisies, geskil
- 250 ml (1 k) aftreksel
- 250 ml (1 k) rooiwyn
- 2 hande vol botterskorsieblokke
- 2 hande vol patatblokke
- 1 hand vol sagte, gedroogde appelkose
- hand vol pietersielie, gekap
Metode
- Verhit die helfte van die olie in die potjie en braai die sout-en-peper gegeurde lamsboud tot goudbruin aan alle kante.
- Verhit die brandewyn en gooi dit oor die boud in die potjie. Steek die brandewyn met ’n vuurhoutjie aan die brand – wees versigtig, die vlamme kan hoog brand – en laat uitbrand.
- Voeg die knoffelhuisies en roosmaryn by die vleis in die pot, daarna die aftreksel en rooiwyn. Bedek en prut vir sowat 3 uur.
- Pak eerste die botterskorsie, dan patatblokke en appelkose bo-op en langs die boud . Bedek en prut vir nog 30-60 min. of tot gaar.
- Meng die pietersielie deur en sit voor.
