“Volspoed vang Suid-Afrikaanse motorsport eg vas,” sê skepper en uitvoerende vervaardiger Carl Martin.
“Dis vinnig, vreesloos en vol hart; maar fokus op ’n familie wat saam uitmuntendheid najaag, ten spyte van die prys. Dit is ’n realiteitsreeks soos min ander – daar is iets vir almal.”
Die reeks bestaan uit agt episodes en is aangevuur deur die wêreldwye belangstelling in reekse soos Drive to Survive. Volspoed lig die enjinkap van ’n wêreld waar elke sekonde tel, waar een fout alles kan laat ontspoor en waar oorwinning veel meer verg as net perdekrag.
Op die baan jaag Antonie honderdstes van ’n sekonde teen snelhede bo 200 km/h, maar van die baan af trotseer die Marx-gesin ’n moeiliker roete: ambisie, opoffering en die emosionele hoogtes en laagtes van ’n vinnige lewe.
Ontmoet die span:
Antonie Marx
Antonie het in die motorsportwêreld grootgeword. Sy pa, Piet Marx, het as tiener by die Suid-Afrikaanse renlegende Tony Viana vakleerlingskap gedoen en daarna verskeie klub- en provinsiale titels op grond- en teerteerovale verower.
Piet het later sy eie nalatenskap gevestig deur ’n volledige renbaan op sy plaas te bou, ’n privaat toetsgrond waar Antonie reeds lank voor ander kinders agter die stuurwiel geplaas is.
Teen 15 het Antonie reeds by klub- en provinsiale kampioenskappe koning gekraai en in sy pa se voetspore begin volg.
In 2016 betree hy die BMW-reeks, en in 2019 skuif hy na die Mobil 1 V8 Supercars. Ná gereelde podiumplekke en oorwinnigs in albei reekse, stig hy Motorrenne Span om aan die South African Endurance Series se eenuur-uithouresies deel te neem.
Ronette Marx
Ronette is ’n internasionale model, televisie-aanbieder en was in 2016 ‘n top 12-finalis in Mej. Suid-Afrika. Sy het ’n suksesvolle loopbaan in Mumbai opgebou, met verskynings in Bollywood-rolprente, musiekvideo’s en verskeie aanbiedingsprojekte.
Sy het later na Suid-Afrika teruggekeer en met Antonie getrou, die twee is saam sedert hulle 21 en 24 was. Vandag bestuur Ronette ’n florerende estetiese velsorgateljee in Johannesburg, benewens haar rol in die span se media, administrasie en geleentheidsbestuur. Sy balanseer dit alles saam met haar modelloopbaan en is die organisatoriese ruggraat van die familie.
Piet Marx
Piet, nou afgetree, fokus voltyds op Antonie se loopbaan. Hy bestuur ’n werkswinkel in Bloemfontein waar hy renmotors bou en instandhou. Hy werk nou saam met hoofwerktuigkundige Steven Theron, wat ook as Antonie se spanhoof optree.
Joost Maree
Joost het voorheen die Taurino Racing Team bestuur, waar hy toesig gehou het oor ’n vloot van tien Ferrari Challenge-motors en ’n Porsche Cup Car. Hy het in 2014 by Stradale Racing aangesluit as hoof van tegniese bedrywighede. Onder sy leiding het beide spanne nasionale kampioenskappe ingepalm, wat sy reputasie as een van Suid-Afrika se voorste reningenieurs versterk.
Braam Muller
Braam het in ’n motorsportgesin grootgeword en meganiese ingenieurswese studeer voordat hy sy afstel-loopbaan by Zwartkops Raceway begin het. Hy het later na Pretoria-Wes uitgebrei, waar hy ’n gespesialiseerde fasiliteit bestuur wat pasgemaakte voertuie vir spanne ontwikkel – van amateurs tot vervaardigers.
KYK | Volspoed se lokprent
Kyk Volspoed elke Dinsdag vanaf 6 Januarie 2026 op Showmax.
Lees ook: Mila Guy in ‘Suidooster’: Is haar karakter Aiden se groot liefde?
