Peer- en-bessie-jogurtstafies

Resep deur Rediscover Dairy.

Genoeg vir 16 stafies.

Bestanddele

• 5 ml (1 teelepel) botter
• 2 pere (ongeveer 280 g), geskil en in blokkies gesny
• 150 g bevrore gemengde bessies
• 10 ml (2 teelepels) heuning
• 5 ml (1 teelepel) vars suurlemoensap
• 5 ml (1 teelepel) vanieljegeursel
• 30 g hawermoutvlokkies
• 25 g koekmeel
• 30 g bruinsuiker
• 15 g klapper
• 2,5 ml (½ teelepel) gemaalde kaneel
• 40 g botter
• 375 ml (1½ koppies) volroom, gewone jogurt

Metode

1. Smelt die botter in ’n kastrol. Voeg die pere by en kook vir ongeveer 2 minute, terwyl jy gereeld roer.
2. Voeg die bessies by en kook vir nog 2 minute.
3. Roer die heuning en suurlemoensap by en kook vir ongeveer 5 minute, of totdat die vrugte sag is en die vloeistof verminder het.
4. Verwyder van die hitte en roer die vanieljegeursel by. Laat eenkant staan om af te koel.
5. Om die krummel te maak, voorverhit die oond tot 160 ºC en voer ’n klein bakplaat met bakpapier uit.
6. Meng die hawermout, meel, suiker, klapper en kaneel in ’n bak. Voeg die gesmelte botter by en meng goed.
7. Versprei op die bakplaat en bak vir ongeveer 15 minute tot goudbruin. Laat heeltemal afkoel en breek dan in krummels.
8. Voer ’n vierkantige bakpan van 20 cm met bakpapier uit. Meng die vrugtemengsel met 1 koppie van die gewone jogurt. Skep in die pan en versprei in ’n egalige laag. Skep die oorblywende jogurt bo-op en trek liggies deur om ’n gemarmerde effek te skep.
9. Sprinkel die krummel bo-oor en druk liggies vas. Vries oornag en sny dan in stafies. Bêre in die vrieskas.