Pienk lamingtons (ystervarkies)

Genoeg vir 2 koeke.

Bestanddele

Basiese sponskoek

• 4 eiers
• 260 g strooisuiker
• 280 g koekmeel
• 15 ml bakpoeier
• 250 ml melk
• 100 g botter
• 5 ml vanielje

Basiese botterversiersel

Meng 500 g botter, 500 g versiersuiker en 5 ml vanielje met ’n handklitser en klop tot die versiersel lig en donsig is.

Metode

Basiese sponskoek

1. Voorverhit die oond tot 180 °C. Voer twee 17,5 cm-koekpanne met bakpapier uit vir hoë koeke, of twee 20 cm-panne vir laer koeke, en spuit met kleefwerende kossproei.
2. Klits die suiker en eiers tot dik en lig.
3. Sif die meel en bakpoeier saam en vou by die eiermengsel in.
4. Verhit die melk en botter, maar moenie laat kook nie.
5. Roer die warm melkmengsel by die res van die bestanddele en gooi die vanielje by.
6. Verdeel die mengsel tussen die pannetjies en bak vir 25-30 min. in die middel van die warm oond tot goudbruin.

Pienk lamingtons

Maak een hoeveelheid van die basiese sponskoekresep

1. Smeer 2 lamington-panne van 26 cm x 22,5 cm x 4,5 cm met botter en bestuif met meel.
2. Vul die pan met die basiese koekdeeg en bak vir 30 min. in ’n voorverhitte oond van 180 °C, of tot ’n toetspen skoon uitkom. Laat afkoel en keer op ’n snyplank uit.
3. Sny die koek in 15 vierkante en hou eenkant tot benodig.
4. Maak ’n pakkie pienk jellie volgens die aanwysings op die pakkie aan.
5. Laat staan tot die jellie begin set maar nog loperig is.
6. Doop die koekvierkante in die jellie.
7. Gooi 250 ml fyn klapper in ’n bord en rol die vierkante daarin.
8. Sit vir 20 min. in die yskas en sit voor.