Piesangkoek

Genoeg vir 1 groot koek of 2 teebroodjies.

Bestanddele:

• 290 g strooisuiker
• 200 g sagte botter
• 2 eiers, liggies geklits
• 5 ml (1 t) vanielje-ekstrak
• 250 ml (1 k) sowat 3 ryp piesangs, fyn gedruk
• 10 ml (2 t) brandewyn
• 2 ml (½ t) koeksoda
• 5 ml (1 t) bakpoeier
• 280 g koekmeel
• 2 ml (½ t) sout
• 125 ml (½ k) karringmelk
• 50 g okkerneute, fyn gekap
• 180 ml (¾ k) klapper, plus ekstra vir bo-op

Metode:

Versiersel

1. Klop 250 g sagte botter en 500 ml (2 k) versiersuiker saam tot lig.
2. Gooi 60 ml (¼ k) ingedampte melk by en klop goed met ’n elektriese klitser.
3. Versier met ekstra geroosterde klapperskaafsels. koek

Koek

1. Voorverhit die oond tot 180 °C. Spuit 2 ronde 23 cm-koekpanne, of 2 x 2 cm x 9 cm x 19 cm-broodpannetjies met kleefwerende kossproei.
2. Room die suiker en botter saam tot lig. Gooi die eier en vanielje by en meng goed.
3. Roer die brandewyn en piesang by. Sif die koeksoda, bakpoeier, koekmeel en sout saam.
4. Meng die meelmengsel en karring-melk om die beurt by die piesangmengsel. Roer die okkerneute by.
5. Strooi ’n lagie klapper in elke pannetjie. Verdeel die beslag tussen die pannetjies.
6. Maak gelyk en strooi die res van die klapper oor. Bak vir 35-40 min. of tot ’n toetspen skoon uitkom.
7. Laat die koek afkoel en keer uit.
8. Versier en strooi ekstra klapper oor.