Polentatjips

Bestanddele

• 500 ml (2 k) melk
• 5 ml (1 t) fyn gekapte knoffel
• 2 lourierblare
• sout en swartpeper
• 170 g polenta
• klein hand vol salie, fyn gekap
• klein hand vol sprietuie, fyn gekap
• hand vol pietersielie, fyn gekap
• 20 g parmesaan, gerasper
• 100 g bokmelkkaas
• olie vir braai

Metode

1. Spuit ’n vlak pan van 26 cm x 35 cm met kleefwerende kossproei.
2. Bring die melk, knoffel en lourierblare in ’n klein kastrol oor matige hitte tot kookpunt.
3. Voeg die polenta in ’n dun straaltjie by terwyl jy dit deurentyd roer. Verlaag die hitte en kook die polenta vir 6 min. of tot gaar. Haal die lourierblaar uit.
4. Geur met sout en swartpeper. Voeg die salie, sprietuie, pietersielie, parmesaan en bokmelkkaas by.
5. Gooi die polenta in die voorbereide pan. Sit in die yskas vir 30 min. of tot gestol.
6. Sny die polenta in tjips van 2 cm x 6 cm. Verhit die olie in ’n diepbraaier of groot kastrol tot 180 °C. Diepbraai die polentatjips in sarsies vir 2-3 min. of tot goudkleurig en krakerig.
7. Skep uit en dreineer op kombuispapier. Geur met sout en swartpeper.