RESEP: Armand Aucamp se witvis met vanieljesous van Tahiti
Die bekende akteur Armand Aucamp ken van kosmaak en is ’n voorstander van ’n laekoolhidraatdieet. Sy eerste boek, Armand kook kaal, was ’n topverkoper. Sy toeganklike benadering tot kos laat ’n mens nuut oor eet en leef dink. Sy disse word gewoonlik met bekostigbare bestanddele, wat reeds deel van jou koskas is, gemaak. Armand wys dat eenvoudige kos soms die lekkerste en gesondste kan wees.
Armand se jongste kookboek
Lees ook: Forel met spek
Armand Aucamp se witvis met vanieljesous van Tahiti
Armand se witvis met vanieljesous van Tahiti
4 porsies
Bestanddele
Sous
2 e botter
1 prei, in skywe gesny
1 knoffelhuisie, gekap
1 k room
1 t vanieljegeursel (of 1 vanieljepeul)
½ k hoenderaftreksel
¼ k brandewyn
sout
Vis
4 witvisfilette (geelstert, engelvis of stokvis)
2 e olyfolie
sout en peper
Groente
2 e olyfolie
1 rooi soetrissie, in dun repies gesny
400 g broccolini
sout en peper na smaak
Bediening
suurlemoenwiggie
vars pietersielie, gekap
Metode
Sous
- Smelt botter in pot oor matige hitte en braai prei vir drie minute. Voeg knoffel by en braai vir nog drie minute.
- Vroeg room, vanieljegeursel (of -peul), hoenderaftreksel, brandewyn en sout by. Sodra sous liggies begin prut, verlaag hitte na laag vir vyf tot tien minute. Roer kort-kort.
Vis
- Verhit groot pan oor hoë hitte. Sodra pan warm is, voeg olyfolie by en braai vis sowat vyf minute aan ‘n kant of tot gaar. Geur. Hou warm in oond teen 100 °C.
- Sous behoort nou afgekook en verdik te wees. Kook vir nog vyf minute vir ‘n effens dikker sous. Geur na smaak. Sit plaat af, maar hou sous daarop om warm te bly.
Groente
- Verhit olyfolie in skoon pan oor hoë hitte en braai soetrissie en broccolini vir vyf minute. Dit moet nog effens krakerig wees. Geur met sout en peper na smaak.
- Sit vis bo-op groente, drup vanieljesous oor en garneer met pietersielie en suurlemoenwiggie. Chenin blanc is ‘n goeie pasmaat
Armand vertel: “My suster, Marcelle, werk al vir jare op luukse seiljagte. Sy het omtrent al elke hoek en draai van die aardbol gesien en het vir ongeveer vier maande op die Frans-Polinesiese eilande Tahiti en Bora Bora gebly. Toe ek idees vir die tweede Armand kook kaal– boek begin versamel, het sy gesê ek kan dit nie sonder ‘n tradisionele witvisgereg van die eilande doen nie, en hier is dit … Witvis met vanieljesous.”
Lees ook: Resep: Marinda Engelbrecht se tjipshoender
