Die bloedjong en talentvolle Judi Hattingh is skaars 13 jaar oud, maar sy het reeds die teaterwêreld aan haar voete. Sy het vanjaar die verhoog betree met haar eerste professionele rol as Helen Keller in die bekroonde produksie Annie + Helen, ’n vertolking wat haar nie net lof van gehore landwyd besorg het nie, maar ook ’n Kanna-toekenning vir Beste Opkomende Kunstenaar of Nuweling.
Annie + Helen is gegrond op die ware verhaal van Helen Keller en haar toegewyde onderwyseres, Annie Sullivan, en vertel die roerende verhaal van twee vroue wat mekaar se lewe onherroeplik verander. In 1887 ontmoet die 25-jarige Annie die 12-jarige Helen, ’n kind wat nie kan sien, hoor of praat nie. Wat volg is lewensveranderend. Annie verstaan dat taal vir die verstand net so noodsaaklik is as lig vir die oog. Daarsonder sal die deure na Helen se wêreld vir ewig toe bly, en met onwrikbare geduld maak Annie die deure van Helen se wêreld oop.
“Ek moes leer om die wêreld deur ander sintuie te ervaar,” vertel Judi. “Om die rol eerlik te speel moes ek soos sy voel hoe dit is om die wêreld met my vingerpunte te verstaan en van daardie donker plek af te leef.”
Judi, die hoofdogter van Curro Durbanville Primary, vertel dis vir haar ’n massiewe eer en voorreg om deel van “hierdie storie van hoop” te wees.
“Dit het so groot en goeie impak op mense se lewens omdat dit werklik ’n verskil maak in hoe hulle ander mense sien. Ons lewe nie in ’n swart en wit wêreld nie, daar’s soveel verskillende tipe mense. Ek’s so bly dit maak mense bewus van doofblinde mense.”
Met ’n rolverdeling wat Cintaine Schutte, Bianca Flanders, Stian Bam en Eldon van der Merwe insluit; regie van Hennie van Greunen en produksie deur Pedro Kruger van Wordsmith’s Theatre Factory, het Annie + Helen reeds by verskeie feeste staande ovasies gekry – van die KKNK tot die Suidoosterfees – en nou wag Toyota Stellenbosch Woordfees-gangers om dié kragtige, roerende produksie op Stellenbosch te ervaar. Judi sê sy sien veral uit om die gehoor se reaksies te sien: “Ek wil graag hoor wat hulle van die stuk dink en wat hul daaruit neem. Ek is ook baie opgewonde om in die Adam Small-teater op te tree. Dis ’n ongelooflike eer.”
Voor die Toyota Stellenbosch Woordfees afskop, het Karlien Meiring vir Judi ’n paar vinnige vrae gevra oor haar rol, haar groei as aktrise en die boodskap agter die storie.
Hennie van Greunen het gesê hy het jou juis hierdie rol gegee omdat dit al jou natuurlike sterkpunte uitdaag. Hoe het dit jou as akteur laat groei?
Helen is blind, stom en doof en het uit die aard van die saak geen woorde nie. Ek as aktrise, is baie verbaal en verkies gewoonlik rolle met baie woorde. Ek is goed daarin om te reageer op dit wat mense sê, nog iets waartoe Helen nie in staat is nie.
Hierdie rol het my geleer om uit my gemaksone te klim en meer op my lyftaal, gesig, reuk en tas-sintuie staat te maak, want dit is al manier waarop ek die boodskap kan oordra. Ek het as aktrise baie gegroei en ervaring opgedoen. As mens, wat in iemand met gestremdhede se skoene moet klim, en gesien het hoe moeilik dit is, het ek opnuut empatie en ’n besef van hoe moeilik dit vir so iemand is.
Wat hoop jy neem die gehoor saam huis toe nadat hulle Annie+Helen gesien het?
Ek hoop die storie raak die gehoor op ’n diep vlak en dat dit ’n positiewe, mooi impak op hul lewens maak. Annie en Helen leer mense om geduldiger met ander te wees; Annie is ’n wonderlike voorbeeld van iemand wat nooit opgee nie, ongeag van moeilike en frustrerende omstandighede. Ek hoop ook die gehoor is opnuut dankbaar vir al hul sintuie en hul gesondheid, en sê vir die Here dankie vir alles wat ’n mens soms as vanselfsprekend aanvaar.
Jy is nog so jonk, maar speel teenoor groot name soos Cintaine Schutte en Stian Bam. Wat het jy by hulle geleer?
Ek het geleer dat ’n mens energie na repetisies toe moet bring en nie bang moet wees om voorstelle te maak nie. My passie en liefde vir toneelspel het net nog meer gegroei. Ek het ook geleer hoe belangrik dit is om navorsing oor jou karakter te doen en hul emosionele reis met sy hoogtepunt en laagtepunt te verstaan. Jy as akteur moet iets in jou karakter vind wat jy liefhet.
Watter deel van die toneelstuk het jou die meeste geraak. Hoekom?
Helen skree naby aan die einde. Sy gee hierdie vreeslike aaklige, amper dieragtige gil van pure angs, frustrasie en woede. Al die emosies wat sy in die toneelstuk ervaar, word in hierdie oomblik uitgelaat. Dis ’n emosionele oomblik wat moeilik en intens was om reg te kry.
Wie is Judi as jy nie op die verhoog is nie?
Ek is 13, en as tiener leer ken ek nog myself. Ek is snaaks, baie liefdevol, ’n goeie vriendin, praat baie en bring vreugde in ander mense se lewens. Ek geniet die lewe en glo ’n mens moet in die oomblik leef en nie bang wees vir wat kom nie.
Lees ook: Boer soek ’n vrou: Pieter en Rudi H maak hul finale keuses
