Raad om ’n studente-motor te koop

Raad om ’n studente-motor te koop deur Anet Schoeman. Foto’s: Unsplash

Nuben Dixon, bedryfshoof by Gumtree Auto, gee ’n paar wenke vir ouers en studente wat na ’n gebruikte motor op soek is.

1. Is dit nodig?

Het jy werklik ’n voertuig nodig? Stel eers ondersoek in na plaaslike bus- en treinopsies, sowel as dienste soos Uber of saamry-klubs . En wees realisties as jy openbare vervoer met die koste van ’n motor vergelyk. Neem die slytasie, versekering en dienste van ’n voertuig in ag. Boonop is parkering op kampusse gewoonlik ’n probleem.

Lees ook: 17 dinge waarna jy moet kyk wanneer jy ’n kar koop

Raad om ’n studente-motor te koop

2. Wat is jou begroting?

Wees realisties oor hoeveel jy kan bestee. Koop met jou kop en nie jou hart nie. Reken ook die koste van versekering, onderhoud, brandstof en registrasie by die prys in. Soek landwyd – vervoerkoste om die motor by jou te kry kan veel minder as die algehele besparing wees.

Lees ook: Voordat jy ’n nuwe kar koop moet jy eers hieroor dink

Raad om ’n studente-motor te koop

3. Is dit die beste wat jy kan bekostig?

Koop die beste wat jy kan bekostig. Koop liewer ’n betroubare voertuig met minder weelde as andersom. Jou selfoon kan instaan vir navigasie sowel as ’n klankstelsel.

Lees ook: Kry meer uit jou brandstoftenk

4. Onthou om te dink aan sekuriteit

Studentemotors staan selde snags in toesluitgarages, en word bedags parkeer op plekke waar diefstal ’n risiko is. Bly weg van allooiwiele en duur klanktoerusting om die kans op diefstal te verminder. Moenie goed in jou voertuig laat rondlê nie. Belê in ’n rathefboom- of stuurwielslot as jou voertuig nie goeie sekuriteit het nie.

5. Betroubaarheid is die belangrikste ding

Betroubaarheid staan bo-aan jou lysie. Gaan die diensgeskiedenis na en vra die huidige eienaar uit oor probleme. Dis ideaal as jy die voertuig by ’n bekende kan koop wat oop kaarte met jou kan speel.