Deur Maegan-Leigh Jacobs. Hooffoto: Unsplash
Eiers is maklik iets wat altyd in enige huis se spens of koskas gevind kan word. Dis ’n veeldoelige en voedsame bestanddeel wat in vele resepte gebruik word. Om werklik die voordele van hierdie kosjuweel te geniet, is dit belangrik om seker te maak dat die eiers wat jy gebruik vars is. Gelukkig is daar klomp eenvoudige tegnieke wat jy kan gebruik om vas te stel of eiers vars is.
Die dryftoets
Een van die betroubaarste metodes om te toets of eiers vars is, is die dryftoets. Maak ’n bak vol water en plaas ’n eier versigtig daarin. As die eier sink en plat op die bodem lê, is dit vars en veilig om te eet. Soos ’n eier ouer raak, raak die lugsel aan die binnekant groter wat maak dat dit kan dryf. As die eier opstaan op die bodem of effens na die kant toe leun, is dit steeds veilig om te eet, maar dis beter om dit te bak of hard te kook. Jy kan steeds die eier braai, maar die eiergeel sal nie meer in ’n ronde, plomp vorm wees nie. Die eiergeel sal versprei. As die eier heeltemal dryf, is dit beter om dit weg te gooi!
Die reuktoets
Soos eiers ouer word, laat hulle swaelgasse vry wat tot die kenmerkende nare reuk bydra. Om die reuktoets te doen, hoef jy slegs die eier in ’n bak oop te breek en te ruik. ’n Vars eier het min tot geen herkenbare reuk nie, terwyl ’n ouer eier ’n duidelik swaelgasreuk afgee. As jy ’n onsmaaklike reuk optel, is dit beter om liefs die eier weg te gooi.
Die skudtoets
Skud die eier liggies langs jou oor. Vars eiers sal min of geen klank maak nie, wat wys op ’n klein lugsel. ’n Ouer eier sal ’n duidelike geluid maak omdat die eier se eiersel groter word soos dit ouer raak. Hoewel die skudtoets nie dieselfde akkuraatheid as die dryftoets het nie, kan dit steeds waardevolle insigte rondom die eier se varsheid bied.
Die kraaktoets
Die kraaktoets is nog ’n manier om te toets of die eier vars is. ’n Vars eier sal ’n dik, taai eierwit hê wat amper nie versprei nie, terwyl die eiergeel plomp en rond bly. As die eierwit wyd versprei en die eiergeel geel lyk, dan is die eier besig om oud te word.
Dis belangrik om seker te maak eiers is vars om die smaak en veiligheid van die maaltye wat jy maak te verseker. Niemand wil immers voedselvergiftiging kry as gevolg van ou of slegte eiers nie! Deur hierdie metodes te gebruik, kan jy maklik vasstel of die eiers vars is voordat jy dit in jou maaltye voeg. Onthou dat die dryftoets vir jou die betroubaarste aanduiding kan gee. Met hierdie eenvoudige tegnieke byderhand, kan jy met selfvertroue die voordele van vars eiers in jou pogings in die kombuis gebruik.
Lees Meer
