Daar is drie soorte meringues:
1. Switsers/eenvoudig
Hier word suiker by die eierwit ingeklits. Die suiker word in twee fases by die eierwit gevoeg. Eers word ’n bietjie suiker bygevoeg om die eierwit te stabiliseer en dan word die res bygemeng tot die meringue dik en glansend is.
2. Italiaans
’n Warm suikerstroop word by die eierwitte gegooi terwyl jy klits. Die meringue is meer stabiel en word veral in bakkerye gebruik.
3. Gekookte meringue
Die eierwit en suiker word by lae hitte en oor ’n dubbelkoker saamgeklits.
Basiese meringue-resep
Genoeg vir een middelslag-pawlowa.
Ek verdubbel gewoonlik die resep om ’n lekker groot pawlowa vir 8-10 mense te maak.
• 200 g suiker
• 4 eierwitte
• knypie sout
• knypie kremetart
1 Voorverhit die oond tot 110 °C. Voer ’n bakplaat met bakpapier uit.
2 Klits die sout, kremetart en eierwitte met ’n elektriese klitser of in ’n staanmenger tot stywepuntstadium.
3 Gooi 45 ml (3 e) van die suiker by en klop vir sowat 1-2 min. tot die eierwitte glansend wit is en weer punte maak.
4 Gooi die res van die suiker stadig by en klits deurentyd tot die suiker goed ingemeng is. Die eierwit moet dik en glansend wees en stywe punte maak.
5 Skep groot lepels vol van die meringue op mekaar in die middel van die bakplaat. Vorm met die agterkant van ’n lepel ’n groot gepofte sirkel wat effens induik in die middel.
6 Bak vir 1-1½ uur tot die meringue krakerig en gaar is, maar nie verkleur nie.
7 Indien dit nog sag is as jy liggies met jou vingerpunte daaraan raak, kan jy die temperatuur na 60 °C afdraai en vir nog ’n halfuur bak.
8 Skakel die oond af en droog verder in die warm oond uit tot droog en krakerig.
9 Laat heeltemal afkoel op ’n afkoelrak.
10 Bêre die meringues in ’n lugdigte houer. Strooi eers ’n dun lagie suiker onderin die houer en voer met bakpapier uit – dit keer dat die meringues taai word.
#rooirosewenk
Keer dat meringue taai word: Strooi ’n lagie suiker in ’n lugdigte houer en voer met bakpapier uit voor jy die meringue insit.
As jou meringue flop!
Moenie huil nie. Meringue wat traan, of nie behoorlik krakerig bak nie, is steeds smullekker! Breek dit net in stukkies en pak dit in lagies met lekker goed soos:
• Bessiesorbet of sjokoladeroomys
• Dubbeldikroom
• Bessiesous (coulis) of karamelsous
• Vars bessies of perskes, vye en nektariens in kwarte gesny
Wat benodig jy?
Toerusting
• ’n Silwerskoon mengbak, metaal of glas werk die beste. Vermy plastiek, want die vetterigheid keer dat die eierwitte styf word.
• ’n Bakplaat met bakpapier uitgevoer. Skep ’n bietjie van die meringue op die hoeke van die bakplaat en voer met bakpapier uit. Die meringue is soos gom wat die bakpapier plat hou.
• ’n Hand- of elektriese klitser.
• ’n Spuitsak en spuitpunt as jy vorms wil spuit.
Vorm meringues so:
Vorm meringues met ’n groot lepel. Skep hopies van die meringue op ’n bakplaat sodat dit soos vryvorm mini-pawlowas lyk. Los plek tussenin oop, want hulle rys nogal.
Bestanddele
• Dit vat langer om koue, vars eiers styf te klop, maar hulle is stabieler as ouer eiers wat by kamertemperatuur geklits word.
• Eierwitte wat gevries was en voor die mengslag ontvries is, werk baie goed.
• ’n Knypie sout of kremetart help jou om meer volume in eierwit te klop.
• Kleur- en geurmiddels soos koffiepoeier, kakao of speserye in poeiervorm werk beter.
• Jelkleursel, verkrygbaar by spesialiteits-bakwinkels, werk baie goed om te kleur.
Wat is stywepuntstadium?
• Meringue moet tot stywepuntstadium geklop word.
• Die eierwit moet dik en glansend wees en ’n dik lint vorm wat sy vorm behou.
• As jy die klitser oplig, moet die eierwit vorm behou. Dit sal vanweë die suikerinhoud nie heeltemal regop staan soos droë eierwit nie.
• Eierwitte wat te min óf te lank geklits word, sal traan of uitbak en vassit.
• Klammigheid beïnvloed meringue. Moet liefs nie op ’n reëndag probeer bak nie, ook nie langs stomende potte probeer meng nie.
of
• Vul ’n spuitsak met ’n sterpunt met die mengsel. Vou die spuitsak oor jou hand sodat jy die meringue lekker diep in die sak kan skep en nie mors nie.
• Draai die sak aan die bokant toe sodat dit nie uitpeul nie en spuit op die bakplaat. Hou die spuitsak regop bo die bakplaat en druk saggies en eweredig. Dit help dat die meringue nie uitspuit nie en sodat die skuimpies ewe groot is.
Nog blink idees! Probeer hierdie resepte:
Lees Meer
