Deur Maryke Roberts. Foto’s: Clifford Roberts
Goeie kuns, in al sy vorme en genres, laat die mens vir ’n wyle van die lewe se kwellinge vergeet. Kuns is medisyne vir die siel. Voeg daarby die natuurskoon en vars lug van die Klein Karoo en jy het die ideale plek om te herlaai.
Die program vir die 28ste KKNK, geborg deur Absa, is verlede week by Leopard’s Leap in Franschhoek bekendgestel. Kabous Meiring en Dean John Smith was as seremoniemeesters aan stuur van sake, met uittreksels uit twee van dié fees se teaterhoogtepunte.
“By die KKNK wag daar van Saterdag 23 tot Sondag 31 Maart op Oudtshoorn voorwaar ’n kuur vir elke kwaal. Dié fees word in die Maart-skoolvakansie aangebied en eindig oor Paasnaweek. Behalwe vir uitstaande drama, komedie, dans en visuele kuns, is daar ook leefstylervarings en gespreksreekse wat sorg vir heerlike kuier en polemiek. Die fees bied hope gratis en goedkoop vermaak, nie net in meer formele venues nie, maar ook in die strate van Oudtshoorn. Dis jou gesondheidskliniek vir algehele welstand!” Só sê Hugo Theart, uitvoerende hoof en artistieke direkteur van die KKNK.
Vyf kunstenaars word vanjaar hier vereer: Deon Meyer met die KKNK Afrikaans Onbeperk-prys vir literêre bydrae, Jana Cilliers met die KKNK-prys vir vertolking, Eldon van der Merwe met die KKNK-prys vir Jong Stem, Poem Mooney met die KKNK-prys vir Lewensbydrae tot Kuns en Kultuur en die visuele kunstenaar Colbert Mashile is die Feeskunstenaar.
Deon Meyer en Coenie de Villiers keer ná hul sensasionele Karoo Suite-vertonings terug met Roem: ’n Musiekverhaal. Anrich Herbst, Eldon van der Merwe, Daneel van der Walt, Nelandi Boshoff, Mauritz Lotz & Blake Hellaby is op die verhoog, onder regie van Nicole Holm.
Jana Cilliers deel in die drama Veelhoek – een van 27 feesdebute op die program – die verhoog met Ludwig Binge, onder regie van Marthinus Basson. Cilliers het ook die teks geskryf. Sandra Prinsloo en David Viviers is te sien in Henque Heymans se satire Op die hoek van Styx en River is Nora per abuis met die dood oorgeslaan. Prinsloo speel ook die hoofrol as Maria Callas in die bekroonde produksie van Terrence McNally se Master Class. Antoinette Kellermann en André Roothman is op die verhoog in Die stoele, ’n klassieke tragi-klug deur Eugène Ionesco, met regie, ontwerp en vertaling deur Basson.
Bekroonde skrywer en dramaturg Willem Anker keer ná tien jaar terug met ’n nuwe toneelteks, Patmos. Tinarie van Wyk Loots, Marlo Minnaar, Eben Genis, René Cloete en Marelize Viljoen is op die verhoog te sien, met regie en ontwerp deur Jaco Bouwer.
Stand-up kry in 2024 ’n tuiste by die fees, met Kekkelkliniek wat ’n hoogtepunte uit dié aanbod is. In hierdie skaterlagvertoning is onder andere Alfred Adriaan, Stuart Taylor, Conrad Koch & Lindy Johnson op die verhoog. Komediante wat in solo-optredes te sien is, sluit in Ambrose Uren, Koch (en sy poppe), Dalin Oliver, KG Mokgadi, Mel die Storieverteller, Rob van Vuuren, Taylor, Yasseen Barnes, asook Johnson & Kate Pinchuck wat saam op die verhoog is.
Van die musiekdebute sluit in: Stef Bos se terugkeer na die KKNK vir die eerste keer in meer as ’n dekade vir Bijna 30 jaar later; Zolani Mahola (The One Who Sings) & Dozi deel die verhoog in Die kort en die lank. In Blommetjie gedenk aan my is onder andere Anton Goosen, Sonja Herholdt, Zolani Mahola, Lise Swart, Schalk Joubert & Illimar Neitz te sien. Wouter van de Venter & Clinton Waring se Beste vriende sing Laurika is ’n viering van Laurika Rauch se musiek; Winand Grundling (orrel) & Johann Nel (verteller) is te sien in Aanskou die mens; CH2: Spanish Fire met kitaarduo Corneille Hutten & Christiaan Jacobsz; Jak de Priester se Hartkamer; Elzabé Zietsman & Tony Bentel is te sien in Vier Panado’s en ’n Chardonnay en Petronel Baard, Chanette Paul, Jan van Tonder & Alzanley is te sien in Tweeluik.
Die KKNK is ’n familiefees en die feesaanbod sluit ’n uitgebreide verskeidenheid van jeug- en familieteater in.
Uitstaande teaterproduksies van ander kunstefeeste is ook op die program ingesluit, waaronder Die vegetariër, ’n drama met Tinarie van Wyk Loots, Wilhelm van der Walt, Eben Genis & Melissa Myburgh, onder regie van Jaco Bouwer; Philip Rademeyer se drama Goed wat wag om te gebeur, met Antoinette Kellermann, Gideon Lombard & Emma Kotze; Routrip, Elzabé Zietsman se dramakomedie; Jefferson J. Dirks-Korkee se drama Rooilug, Lara Hattingh se solo-drama Byster en die gewilde sketskomedie Die Francois Toerien Show +.
Drie van die top-produksies uit die Universiteit Stellenbosch se Première Teaterfees in 2023 maak ’n draai in die Klein Karoo: Incarnations of Sand, ’n absurde teaterstuk; Su’walla Kassam, ’n klug met verskeie kinkels wanneer ’n paartjie uit verskillende gelowe op trou staan en The Old Man Who Thought He Had a Dog, ’n tragi-komedie, wat as wenner van die Première Teaterfees aangewys is.
Twee dansteaterproduksies is te sien, met Joburg Ballet wat vir die eerste keer by die KKNK optree in ’n opwindende trio van werke met een Suid-Afrikaanse première en twee wêreldpremières vir SCARCITY, terwyl Figure of 8 Dance Collective in Set in Motion die lewe se onverwagse draaie en ompaaie, asook die uitwerking daarvan op ons ondersoek.
Lucky Pakkie-teater keer terug na Baron van Reedestraat met kraakvars teaterkonsepte. Die inhoud is – nes die lucky packets van ouds – hoogs geheim. Elke Lucky Pakkie bestaan uit vier vertonings van 15 minute elk.
Die Feesmark is die hartklop van die fees en hier kan feesgangers vir ure wandel deur dié inkopieparadys se stalletjies. Die KKNK-winkel swaai sy deur oop in ’n nuwe area met meer en mooier aandenkings as in 2023.
Karoo Kaarte, die KKNK se veelbekroonde en grensverskuiwende multidissiplinêre kunsteprogram wat sedert 2021 op Oudtshoorn gestalte kry, betrek in 2024 Oudtshoorniete se stories en bied allerlei ervaringe dwarsdeur die fees en oor die dorp heen aan.
Kry die feesprogram by www.kknk.co.za. Kaartjies is beskikbaar by Webtickets.
Lees ook: Die Suidoosterfees word mondig! Hier’s waarna jy kan uitsien
