Melissa de Vries oor hoe ‘Arendsvlei’ en ‘Mince Jou Hare’ alles verander het

In Mince Jou Hare vertolk Melissa de Vries (Sasha Daniels in Arendsvlei, Bronwyn in Taktiek) die rol van ene Frieda, wat haar werk by ’n fabriek bedank om ’n haarsalon in haar huis op te rig – ’n besluit wat die lewens van haar familie, bure en kliënte ontwrig.

Dié Showmax Original-sitkom is geïnspireer deur die ware verhaal van Frieda, die ma van die bekroonde komediant Shimmy Isaacs, die reeks se draaiboekskrywer en medevervaardiger.

Caryn Welby-Solomon het met Mel gesels om meer uit te vind:

Dis ’n sitkom wat om Frieda en haar salon draai. Mince Jou Hare gaan oor ’n vrou wat haar drome najaag. Dis ook oor verhoudings. Almal wil in daardie huis wees. Die kliënte kom vir meer as ’n haarafspraak, want dit is ’n veilige ruimte waar hulle hul mure kan laat sak en kan ontsnap van die realiteite wat hulle in die gesig staar.

Shimmy het altyd gesê dat haar ma statisties nie veronderstel was om dit te maak nie. Sy was veronderstel om in die fabriek te bly. Maar sy het die statistieke verkeerd bewys. Sy wys dat dit moontlik is om enigiets te doen. Dit gaan nie oor waar jy vandaan kom nie, maar waarheen jy op pad is.

Lees ook: Vyf-vinnige-vrae met komediant Shimmy Isaacs oor haar Showmax-sitkom, Mince jou hare

 

 

Wat het jou na dié rol aangetrek?

Eerstens, dit was goed geskryf. Dit was so maklik om die lyne te leer. Die manier hoe die karakters gepraat het, het vir my dié wêreld laat verstaan – hul interaksies het bekend gevoel. Een van my susters, Sharon “Sussie” Maarman, het haar eie haarsalon gehad. Sy is nie meer met ons nie, maar dit het my herinner aan daardie wêreld waarin ek grootgeword het en hoe ’n haarstilis met haar kliënte omgaan.

By die oudisie het ek baie pret gehad omdat ons kon speel, en of ek nou die rol gekry het of nie, dít was ’n ervaring wat my soveel hoop gegee het.

Hoekom moet mense Mince Jou Hare kyk?

Dit is snaaks, dit gaan oor familie en hulle sal hulself – of hul tannie of neef of pa – op die skerm sien. Dis ’n storie wat hoop gee en ’n glimlag op jou gesig en in jou hart sal sit. Ons het meer van hierdie tipe stories nodig.

 

 

In jou YouTube-onderhoudreeks, A Walk With Mel, het jy met ander akteurs oor hul ervarings in die bedryf gepraat. Wat het jy opgemerk oor hoe die bedryf verander het?

 

Toe ek grootgeword het, het ek nie gedink dit sou vir my moontlik wees om hierdie werk te doen nie. Natuurlik het ek TV gekyk, maar ek het nie regtig mense gesien wat soos ek gelyk het nie. Toe, uiteindelik, het Arendsvlei gebeur. Ek voel dat Arendsvlei regtig alles vir my verander het, want dit was ’n rolverdeling bestaande uit bruin mense.

Jy kan die verskil sien sedert ek destyds met bruin akteurs begin onderhoude voer het. Ons is baie talentvolle mense en het nie altyd toegang of hulpbronne gehad om voltyds in hierdie bedryf in te gaan nie, maar ek sien al meer bruin mense wat hul eie (geleenthede) skep. Die jonger mense is meer braaf omdat hulle ’n sosiale media-platform het. Hulle sien mense wat soos hulle lyk en klink op TV.

Ek is dankbaar vir almal wat die weg vir ons gebaan het. Hulle het vir ons gewys dis moontlik. Mince Jou Hare het ook gehelp om te wys dat dít moontlik is. Hierdie reeks vier die mense van dorpe soos Worcester. Hier is ’n middelklas-gesin wat hul bes probeer om ’n beter lewe vir hulself te skep.

Jou drome is dus haalbaar; jy moet net aanhou werk aan jou craft. Dit is ’n marathon, nie ’n naelloop nie.

Kyk nuwe episodes van Mince Jou Hare elke Maandag op Showmax, met die volle reeks wat vanaf 12 Augustus 2024 vir fuifkyk beskikbaar sal wees.